Покрај затворската и паричната казна, на Стаменковски му е изречена и забрана за вршење на професија, дејност или должност поврзани со кривичните дела, или како што се наведува во соопштението на Апелација: Забрана да врши регистрација на домеин и да се јави како регистрант или сопственик на портал за време од шест години и престанок на регистрацијата на сите регистрирани домеини во кои обвинетиот се јавува како сопственик на портал
За кривичното дело уцена предметот се враќа на повторно судење, а од Апелација кратко образложуваат дека одлучиле така поради тоа што првостепениот суд не ги утврдил со сигурност „решителните факти кои се од влијание за правилна примена на материјалното право, по однос на елементот од битието на кривичното дело уцена“
Апелацискиот суд Скопје одлучи по жалбите кои, на јавна седница што се одржа на 19 мај, пред второстепeниот суд ги образложи обвинетиот сопственик на парапорталот „Доказ“, Марјан Стаменковски, и неговите адвокати.
Со пресудата објавена денеска, второстепениот суд делумно ја уважи жалбата на Стаменковски и му ја намали казната што претходно му ја одреди Основниот кривичен суд Скопје. Така, сопственикот на „Доказ“ наместо три години и еден месец затвор, колку што му одреди првостепениот суд, со пресудата на Апелација сега ќе треба да отслужи единствена затворска казна од две години и шест месеци.
Паричната казна од 5 000 евра, односно 308 450 денари во денарска противвредност останува и со пресудата на скопскиот Апелациски суд.
„Апелацискиот суд Скопје во интерес на јавноста и медиумите информира дека постапувајќи по кривичниот предмет КЖ-357/23, по одржаната јавна седница на ден 19.05.2023 година, донесе пресуда со која жалбата на Основното јавно обвинителство С., ја одби како неоснована, а жалбите на обвинетиот М. С. од С., делумно ги уважи. По жалбите и по службена должност, пресудата на Основниот кривичен суд Скопје К.бр.429/23 од 04.04.2023 година, ја преиначи во делот на одлуката за кривична санкција на начин што обвинетиот М. С. го осуди на единствена казна затвор во траење од две години и шест месеци и на парична казна во износ од 5 000 евра, во денарска противвредност од 308 450 денари“,
се наведува во соопштението на второстепениот суд објавено на неговата официјална интернет-страница.
Покрај затворската и паричната казна, на Стаменковски му е изречена и забрана за вршење на професија, дејност или должност поврзани со кривичните дела, или како што се наведува во соопштението:
„Забрана да врши регистрација на домеин и да се јави како регистрант или сопственик на портал за време од шест години и престанок на регистрацијата на сите регистрирани домеини во кои обвинетиот се јавува како сопственик на портал“
Стаменковски од првостепениот суд беше прогласен за виновен за пет кривични дела – две за ширење расистички и ксенофобичен материјал и по едно дело: уцена, пиратерија на аудиовизуелно дело и злоупотреба на лични податоци. Како негови жртви во случајот се јавија свештени лица, новинари, истражители, една национална телевизија…
Меѓутоа, покрај намалувањето на затворската казна, Апелација во одлуката објавена денеска одлучила дека за едно од овие дела – уцената, треба повторно да му се суди.
Образложението на Апелација за ваквата одлука е поради тоа што првостепениот суд не ги утврдил со сигурност „решителните факти кои се од влијание за правилна примена на материјалното право, по однос на елементот од битието на кривичното дело уцена“.
Првостепената пресуда против Стаменковски Основниот кривичен суд Скопје ја донесе на 4 април годинава.
Покрај овој, во ОЈО Скопје се води и втор предмет против Стаменковски кој се очекува да ги открие евентуалните нарачатели и соработници за текстовите што тој ги објавуваше на неговиот парапортал. Очекувањата се и да се дознае потеклото на парите кои беа пронајдени при претрес во неговиот дом, кој, како што денеска беше посочено на јавната седница, се во висина од околу 74 000 евра.
На јавната седница во Апелација што се одржа пред 11 дена, сопственикот на парапорталот „Доказ“, Марјан Стаменковски, се бранеше дека не рекетирал и уценувал со неговите текстови и заедно со неговите адвокати побара да се укине првостепената пресуда со која доби три години и еден месец затвор, а предметот да се врати на повторно судење пред Основниот кривичен суд.
Пред тричлениот совет во Апелација тој, исто како и неговите адвокати, реагираше зошто судењето се одвивало со исклучена јавност бидејќи смета дека така се направила суштествена повреда на постапката.
Инаку, во судницата во Апелација излезе со тврдења дека соработувал со обвинителот на Вишото јавно обвинителство, Сашо Рајчев, и бараше негово изземање од предметот. Тој тврдеше дека обвинителот му давал информации за текстови објавувани на неговиот парапортал, вклучително и за неговиот шеф, Мустафа Хајрулахи.
Рајчев ги отфрли обвинувањата, оценувајќи ги како обид за одолговлекување на постапката и правење сензации. Тој во изјава за медиумите тогаш рече дека воопшто не го познава Стаменковски, ниту, пак, како што тврдеше, имал лична или каква било комуникација со него.
Обвинителот на ВЈО, Рајчев, не беше изземен откако републичкото обвинителство донело такво решение со оглед дека шефот на скопското ВЈО, Мустафа Хајрулахи, кој првично требаше да одлучи, се иззема од носење одлука поради спомнување на неговото име од страна на Стаменковски.