Претседателката на Парламентот, Роберта Мецола, како што јавуваат српските медиуми, на почетокот на седницата упатила сочувство до семејствата и пријателите на загинатите, а на повредените им посакала брзо закрепнување
Денешната пленарна седница на Европскиот парламент (ЕП) почна со едноминутно молчење за жртвите од минатонеделните масовни убиства во Србија.
Претседателката на Парламентот, Роберта Мецола, како што јавуваат српските медиуми, на почетокот на седницата упатила сочувство до семејствата и пријателите на загинатите, а на повредените им посакала брзо закрепнување.
„Нашите мисли се со вас“,
рекла Мецола.
Минатата недела во Србија се случија две масовни убиства во кои загинаа вкупно 17 лица.
Првото убиство се случи на 3 мај кога 13-годишен ученик уби осум соученици и чувар во основното училиште „Владислав Рибникар“ во Белград. Во нападот се повредени уште шест ученици и наставничка.
Еден ден подоцна, на 4 мај, се случи вториот масовен напад во кој 21-годишен напаѓач усмрти осум лица, а рани 14 во селата Мало Орашје и Дубона кај Младеновац.
Пратеникот во Европскиот парламент и известувач за Србија, Владимир Билчик, поднесе устен амандман на извештајот за Србија, во кој се осудуваат масовните убиства.
„Европскиот парламент е покрај народот на Србија во овие тешки моменти“,
објави Билчик на Твитер на 8 мај.
@Europarl_EN stands with the people of Serbia in these difficult moments!
— Vladimír Bilčík MEP (@VladoBilcik) May 8, 2023
At the opening of the plenary session @EP_President called for a minute of silence to express our solidarity with the families of victims of last week’s mass shootings in Belgrade and Mladenovac. pic.twitter.com/NgBWKKtD2Q
Расправата за извештајот на Билчик за Србија ќе се најде на дневен ред на Европскиот парламент во вторник, а гласањето е закажано за в среда, на 10 мај.
Инаку, делегацијата на Европската Унија во Србија ги одложи сите настани и кампањи по повод Денот на Европа, кој се одбележува на 9 мај. Наместо тоа, на тврдината Калемегдан ќе биде поставена цветна инсталација во чест на жртвите на убиствата и нивните семејства.