Доктор Стојка Нацева-Фуштиќ со дрзок тон и завчера и вчера дојде 2-3 пати во болничката соба и ми кажа доколку пак дојдат новинарски екипи за викендот да давам изјави за лекот „трикафта“, дека за мене повеќе немало да има место во оваа болница за цистична фиброза за лекување, обвинува Пехчевски
Игор Пехчевски кој е сместен на Универзитетската клиника за детски болести и каде прима терапија за цистична фиброза, ја обвини докторката Стојка Нацева-Фуштиќ, која е в.д. медицински директор на детската клиника дека му се заканила oти ако дава изјави за лекот „трикафта“, за него нема да има место во болницата за лекување.
„Д-р Стојка Нацева-Фуштиќ со дрзок тон и завчера и вчера дојде 2-3 пати во болничката соба и ми кажа доколку пак дојдат новинарски екипи за викендот да давам изјави за лекот ‘трикафта’, дека за мене повеќе немало да има место во оваа болница за цистична фиброза за лекување. Докторке оваа болница не е лично Ваша за да може така дрско да се однесувате со пациентите и да давате изјави дека пациентот ќе си оди на 15.04.2023 година. А, имам документ со отпусна листа која е со датум 18.04.2023 година. Како ќе ме погледнете во очи мене и другите пациенти за ова што ми го правите пред цела македонска јавност“,
пишува Пехчевски на својот фејсбук профил.
Претходно Пехчевски објави дека лекувањето му е почнато на 04.04.2023 година и дека тоа задолжително треба да трае до 17.04.2023 година.
„Се ускратуваат цели два дена од примањето на венската терапија. Периодот за хоспитализација секогаш ни е предвидена 14 денови на секои три месеци. Незнам зошто некој мене би ме испишал пред време“,
додаде Пехчевски.
По објавата на Пехчевски дека му биле вршени притисоци и предвреме било побарано да ја прекине хоспитализацијата на Универзитетската клиника за детски болести со реакција за ТВ Телма се огласи и Нацева-Фуштиќ.
Тврди дека Игор никој не го бркал да си оди, му било понудено да биде со своите за Велигден, но откако тој тоа го одбил му било кажано дека може да остане до вторник.
Таа вели дека целиот негов револт е поради тоа што не влегол во листата на првите 12 пациенти кои добиле терапија со лекот „трикафта“.
Нацева-Фуштиќ денеска излезе и со соопштение за реакциите на Пехчевски од пред два дена во кое вели дека пациентот е во стабилна состојба и потврди дека утре ќе биде испуштен од клиниката.
„Со спроведување на препишаните терапии и редовна физикална терапија, може да се одржува стабилен. Модулаторната терапија (‘кафтрио’ во комбинација со ‘калидеко’) ќе започне да ја прима кога ќе биде достапна и за пациентите со умерена белодробна болест. Во првата фаза започнавме со терапија кај пациентите со потешка белодробна болест“,
се наведува во реакцијата од Нацева-Фуштиќ.