Со спроведување на препишаните терапии и редовна физикална терапија, може да се одржува стабилен. Модулаторната терапија ќе започне да ја прима кога ќе биде достапна и за пациентите со умерена белодробна болест. Во првата фаза започнавме со терапија кај пациентите со потешка белодробна болест, се вели во реакцијата на Нацева-Фуштиќ
Пациентот И. П. е во стабилна состојба, со умерено засегната белодробна функција со 70 отсто функционалност од предвидената и е предвиден за испишување од Клиниката за утре, сабота, 15.04.2023, стои во реакцијата од доктор Стојка Нацева-Фуштиќ, в. д. медицински директор на Универзитетската клиника за детски болести и одговорен доктор за здравјето на пациентот И. П. додека е хоспитализиран на Универзитетската клиника за детски болести.
Реакцијата на Нацева-Фуштиќ доаѓа по зачестените јавувања во медиумите и социјалните мрежи на пациентот со цистична фиброза И. П. и изјавите дека е во критична состојба.
„Со спроведување на препишаните терапии и редовна физикална терапија, може да се одржува стабилен. Модулаторната терапија (‘кафтрио’ во комбинација со ‘калидеко’) ќе започне да ја прима кога ќе биде достапна и за пациентите со умерена белодробна болест. Во првата фаза започнавме со терапија кај пациентите со потешка белодробна болест“,
се наведува во реакцијата од Нацева-Фуштиќ.
Игор Пехчевски пред два дена во изјава за ТВ Телма рече дека велигденските празници ќе мора да ги помине во болничкиот кревет во детската клиника бидејќи поминале само половина од предвидените 14 дена за терапија.
„За жал, за празниците нема да бидам меѓу моите дома бидејќи ќе мора да бидам хоспитализиран до вторник, што е жална слика. Сакам политичарите да ги повикам да не се препукуваат на седниците, туку да ни го набават лекот“,
вели Игор Пехчевски, пациент со цистична фиброза.
Болните од цистична фиброза пред два дена одржаа протест пред Министерството за здравство на кој алармираа дека по еден месец откако се донесоа законските измени сè уште нема никаков прогрес во однос на набавка на лекот „трикафта“. Тие најавија дека доколку работите се движат вака, веднаш по празниците ќе организираат поголем протест за да покажат дека работите не се движат и дека не се задоволни.
„Пред 10 дена испративме официјален мејл до сите надлежни, Фондот за здравствено осигурување, Министерството за здравство и преставниците на Владата кои се во таа здравствена комисија. Но, и после 10 дена немаме добиено никаков одговор. Како што најавивме и пред некое време, доколку работите се движат вака, веднаш по празниците ќе организираме поголем протест за да може да се појавиме, да покажеме дека работите не се движат и дека не сме задоволни“,
рекоа од Асоцијацијата за цистична фиброза.
По укажувањата од Асоцијацијата за цистична фиброза дека сè уште нема никаков прогрес во однос на набавка на лекот „трикафта“ и најавите кои ги дадоа и дека доколку работите се движат со ова темпо, веднаш по празниците ќе организираат поголем протест, нивни претставници веднаш беа повикани на средба во Министерството за здравство.
Од Министерството за здравство информираа дека претставниците на Асоцијацијата за цистична фиброза, пациенти со цистична фиброза и родители на деца со цистична фиброза биле повикани на разговор со цел запознавање со процесот со кој Министерството веќе активно работи на изнаоѓање сеопфатно решение за овие пациенти.