Герасимовски побарал средба со овие министри бидејќи во двата закони во кои треба да се интервенира доколку се прифати иницијативата за конфискација наместо рушење на дивоградбите, како предлагачи се јавуваат министерствата за транспорт и врски и за правда
Пред два дена, градоначалникот на Општина Центар оваа иницијатива ја претстави и на седница на ЗЕЛС во Валандово, при што доби поддршка од градоначалниците кои исто како и него, сметаат оти таа е неопходна
Откако доби поддршка од членовите на Заедница на единиците на локална самоуправа (ЗЕЛС), градоначалникот на Општина Центар, Горан Герасимовски, иницијативата за конфискација наместо рушење на дивоградбите сега ќе ја презентира и пред ресорните министри за транспорт и врски и за правда, Благој Бочварски и Кренар Лога.
Иницијативата предвидува дивоградбите наместо да се рушат, како што налага законот, да се конфискуваат и да добијат нова намена за граѓаните на општината.
Герасимовски ќе ги запознае министрите со потребата оваа иницијатива да прерасне во законско решение зашто, како што велат од Општина Центар, таа не е нужна само за оваа, туку за сите општини во државата.
„Герасимовски побара средби со Бочварски и Лога, бидејќи двата закони во кои треба да се интервенира доколку се прифати иницијативата, како предлагачи се јавуваат двете министерства. Станува збор за Законот за управување со конфискуван имот, имотна корист и одземени предмети во кривичната и прекршочна постапка за кој како предлагач на законски измени е Министерството за правда и Законот за постапување со бесправно изградени објекти, за кој како предлагач на законски измени е Министерството за транспорт и врски“,
се наведува во соопштението од Општина Центар.
Според најавите од Општината, Герасимовски уште ќе се сретне со министерот за правда, а в понеделник средба ќе оствари и со министерот за транспорт и врски.
Пред два дена, Герасимовски оваа иницијатива ја претстави на седница на ЗЕЛС во Валандово, при што доби поддршка од градоначалниците кои исто како и него, сметаат оти таа е неопходна.
Општина Центар, како и многу други општини е „расадник“ на дивоградби.
„360 степени“ во март објави дека на Водно на диво никнуваат два нови идентични објекти. Општински инспектори им ставиле жолти ленти, но сопствениците ги отстраниле и продолжиле со градењето.
Друг скандалозен случај е со легендарната дивоградба на Пластичарска. За таму Општината во неколку наврати договара уривање, но полицијата откажува асистенција во последен момент.
Уште тогаш Герасимовски кажа дека е дојдено време наместо за уривање, да се размислува и за конфискување на бесправно изградените објекти.