Заменик-министерката за одбрана Хана Маљар рече дека украинските сили продолжуваат да ги бранат своите позиции, додека руските сили не обрнуваат доволно внимание на нивните загуби додека напаѓаат
Украинскиот претседател Володимир Зеленски во неделата навечер изјави дека воената ситуација е „особено жешка“ околу Бахмут бидејќи продолжуваат повеќемесечните напори на Русија да го заземе градот, најдолгата битка од почетокот на руската инвазија.
Основачот на руските платенички сили „Вагнер“, Евгениј Пригожин, изјави дека неговите војници го подигнале руското знаме на управната зграда во градот. Сепак, украинските власти не известија дека Бахмут паднал во руски раце. Пригожин претходно изнел тврдења кои биле предвремени.
„Благодарам на нашите војници кои се борат во Авдиевка, Маринка и Бахмут. Особено во Бахмут, таму е особено жешко. Руските сили со месеци се обидуваат да го опколат и да го заземат Бахмут, град кој имаше 70 000 жители пред да започне руската инвазија пред повеќе од една година“,
рече Зеленски во своето ноќно видео обраќање.
Во аудиопорака објавена на Телеграм на каналот на неговата прес-служба, Пригожин рече:
„Од правна гледна точка, Бахмут е окупиран. Непријателот е концентриран во западните делови“.
Висок украински функционер претходно ја опиша ситуацијата околу градот како напната, при што воената команда внимателно го разгледуваше секој потег.
Заменик-министерката за одбрана Хана Маљар рече дека украинските сили продолжуваат да ги бранат своите позиции, додека руските сили не обрнуваат доволно внимание на своите загуби додека напаѓаат.
„Ситуацијата во Бахмут останува напната. Но, секоја воена одлука и секој чекор внимателно се мерат… Ние одговараме соодветно на ситуацијата што преовладува земајќи ги предвид сите околности, задачи и принципот на воена изводливост“,
напиша Маљар на Телеграм.
Зеленски и воените команданти минатиот месец се согласија да го бранат Бахмут во време на јавна дебата за тоа дали е најдобро да се остане или да се преземат други одбранбени позиции.
Истакнатиот украински воен аналитичар Олех Жданов изјави дека борбите го зафатиле центарот на градот. Украинските сили одбија 25 непријателски напади, но руските сили ја освоија фабриката за метал АЗОМ, која украинските војници ја бранеа со денови.
„Непријателот го напаѓа центарот на градот од север, исток и југ и се обидува да го земе градот под своја целосна контрола. Ние бевме успешни на некои места, а на некои дури и изведовме контранапади. Но, непријателот повремено е успешен, со оглед на бројот на неговите сили и бројот на секојдневните напади“,
рече Жданов, кој има блиски врски со украинската војска во видео објавено на Јутјуб.