Изречени се опомени, и тоа претходно за Артан Груби, а во најновиот случај и за министерот за надворешни работи Бујар Османи и тогаш актуелниот министер за животна средина Насер Нуредини. Не е во ред да се повторува истата работа за која претходно биле опоменати. Ќе провериме дали откако им беа изречени опомените имало нови вакви ситуации и ќе провериме врз етичкиот кодекс што би можеле да преземеме, вели Грковска
Вицепремиерката задолжена за политики за добро владеење Славица Грковска вели дека врз основа на документацијата што ја имаат добиено од Државната комисија за спречување на корупцијата за користењето на службени возила за партиски активности, изрекле опомени за првиот вицепремиер Артан Груби, министерот за надворешни работи Бујар Османи и тогаш актуелниот министер за животна средина Насер Нуредини.
Грковска вели дека за користење службени возила во партиска кампања дециден е етичкиот кодекс.
„Поради тоа врз основа на документацијата што ја добивме од Државната комисија за спречување на корупцијата изречени се опомени и тоа претходно за Артан Груби, а во најновиот случај и за министерот за надворешни работи Бујар Османи и тогаш актуелниот министер за животна средина Насер Нуредини. Досега како кабинет покажавме дека не ни влијае тоа за кого станува збор. Не е во ред да се повторува истата работа за која претходно биле опоменати. Ќе провериме дали откако им беа изречени опомените имало нови вакви ситуации и ќе провериме врз етичкиот кодекс, тоа што нас како кабинет ни е дадено како инструмент, што би можеле да преземеме“,
додаде Грковска одговарајќи на новинарско прашање по денешниот меѓународен научен и стручен симпозиум посветен на високото образование и дигиталната технологија на Американскиот универзитет на Европа – ФОН
За играњето фудбал во канцелариите на вицепремиерот Груби, кое не беше добро прифатено од јавноста, вели тоа не е начин на кој треба да се однесуваат функционерите.
„Не сметам дека е тоа начин на којшто функционерите би требало да се однесуваат и сметам дека треба да се има малку повеќе сензибилитет за тоа како функционерите би требало да се однесуваат и каква слика даваат пред граѓаните“,
вели Грковска.
Прашана во однос на судирот на интереси за фирмата на братот на вицепремиерот Артан Груби, која добила средства од Владата, таа истакна дека очекува ова прашање да го покрене и испита ДКСК бидејќи тоа е, како што вели, во нејзина надлежност.