Производителите на сезонско и режано цвеќе алармираат дека нивниот сектор е пред колапс и ако државата не интервенира, велат, ќе се соочат со банкрот.
Продажбата поради мерките за коронавирусот, велат, им е целосно запрена и веќе ги бројат загубите. Предупредуваат дека ако Владата не им излезе во пресрет фирмите од оваа дејност ќе бидат приморани да ставаат клуч на врата, а тоа, како што велат, значи и дека стотици вработени ќе бидат отпуштени.
„Приморани сме нашето сезонско цвеќе да го уништиме, да го фрлиме. Нашата гранка спаѓа во интензивно земјоделско производство, што подразбира големи трошоци и расходи по единица површина (скапи репроматеријали, греење, ѓубрење/заштитни средства, работна сила). Веќе ги трпиме првите штети, а развојот на ситуацијата е крајно неповолен и неминовно води кон зголемување на загубите во сѐ поголем обем. Имаме вработено и стручни лица, обучени работници, кои поради состојбата не ќе можеме да ги задржиме“,
алармираат членовите на Постојана потсекторска група за цвеќе и украсни дрва (ППГЦУД).
Тие испратија и официјално писмо за помош до Владата, но и барање до Министерството за земјоделство и очекуваат итна реакција и донесување сет конкретни мерки за помош.
„Владиниот кризен штаб да нè стави на листата економски оператори кои се длабоко погодени од кризата со коронавирусот и да ни пружи економска помош и поддршка на сите можни начини и мерки кои ѝ се на располагање или би се донеле во иднина“,
наведуваат од Постојаната потсекторска група.