Дел од протестот ќе бидат синдикати од државниот сектор, болниците, училиштата, како и студентски здруженија
Низа протести и собири ќе се одржат денеска во Атина, но и во други грчки градови во рамките на 24-часовен штрајк што го закажаа грчките синдикати поради железничката несреќа со 57 жртви, јавува дописничката на МИА.
Штрајкот го закажа синдикатот на вработените во државниот сектор (АДЕДИ) соопштувајќи дека неколкучасовниот прекин во работата за одбележување на Меѓународниот ден на жената го претвораат во штрајк за сите заедно да побараат да се стави крај на политиката на приватизација и да се преземе вистинска одговорност за смртоносниот криминал кај Темпи.
Грција денеска е без бродски и железнички сообраќај, во прекин е и јавниот превоз во Атина, со исклучок на метрото и трамвајот што работат неколку часа за да им се овозможи на граѓаните да учествуваат во протестот.
Во штрајкот учествуваат и синдикатите на вработените во државните болници и во училиштата, како и студентски здруженија.
Железничката несреќа што пред една седмица се случи кај месноста Темпи во близина на градот Лариса, а во која загинаа 57 лица, предизвика бурни реакции кај Грците, а протести се одржуваа и во изминатите денови.