Во барањето на Асоцијацијата за цистична фиброза за средба со претседателот во јуни 2021 година ниту тие не бараат претседателот да ги набавува неопходните лекови, затоа што знаат дека надлежните институции за тоа се Министерството за здравство и Фондот за здравствено осигурување, се вели во реакцијата од кабинетот на Пендаровски
Претседателот не е надлежната институција за набавка на лекови, реагираат од кабинетот на претседателот Стево Пендаровски во врска со ставовите искажани од страна на политичката партија ВМРО-ДПМНЕ, кои се однесуваат на ветувања за набавка на лекот за цистична фиброза.
„За жал, не бил неписмен само пратеникот на ВМРО-ДПМНЕ, туку и оние кои го пишувале соопштението на таа политичка партија. Ако можеме некако да им помогнеме на луѓето во ВМРО-ДПМНЕ, во прилог им го доставуваме барањето на Асоцијацијата за цистична фиброза за средба со претседателот во јуни 2021 година, во кое ниту тие не бараат претседателот да ги набавува неопходните лекови, затоа што знаат дека надлежните институции за тоа се Министерството за здравство и Фондот за здравствено осигурување“,
се наведува во реакцијата од кабинетот на претседателот.
Оттаму посочуваат дека во соопштението од средбата никаде не се споменува ветување за набавка на лек, затоа што, како што нагласуваат, за оние кои ги разбираат работите, претседателот не е надлежната институција за набавка на лекови.
„Не веруваме дека јасната содржина во двата документи ќе ви помогне да разберете за што се работи, затоа што е јасна вашата цел, да го дискредитирате политичкиот противник и кога немате буквално ниту еден аргумент на своја страна. Нечовечки е да ги злоупотребувате личните и семејните трагедии на луѓето за добивање политички поени“,
велат од кабинетот на Пендаровски.
Оттаму повторуваат дека иако претседателот не е надлежен за набавка на лекови, тој смета дека сите лица од оваа категорија на болни мора најитно да ја добијат неопходната терапија.
„Претседателот Пендаровски искрено сочувствува со семејството на починатиот Благојче Илиевски. Точно е дека претседателот Пендаровски има одржано не една, туку повеќе средби со здруженијата на граѓани болни од цистична фиброза на нивно барање. И, не само со нив, туку и со многу други здруженија на граѓани во кои членуваат или работат со граѓани од ранливите групи. Секогаш и безусловно претседателот и Кабинетот се заложуваат да решат што повеќе системски проблеми кои ги имаме во нашата држава, независно што не спаѓаат во негови надлежности“,
велат од кабинетот на претседателот Стево Пендаровски.
Во однос на обезбедување на лекот „Трикафта“, како што се наведува во реакцијата, претседателот Пендаровски, како и членовите на неговиот кабинет имаа комуникација и дадоа повеќе предлози до надлежните институции: Владата, министерот за финансии, министерот за здравство и до менаџерскиот тим на Фондот за здравствено осигурување за тоа како и од каде да се обезбедат средства за набавка на лекот.
Денеска пратеникот и член на Извршниот комитет на ВМРО-ДПМНЕ, Драган Ковачки, на прес-конференција го повика претседателот Стево Пендаровски да си поднесе оставка поради, како што рече, негрижата на државата и лажните ветувања за болните од цистична фиброза.
Ковачки, покажувајќи фотографија од Пендаровски со Благојче Илиевски, кој вчера ја изгуби битката со болеста чекајќи го лекот „трикафта“, ги обвини претседателот и премиерот Димитар Ковачевски дека ги користеле болните за „сликање и себепромоција“.