Тоа ќе ја зајакне финансиската стабилност на Украина, ќе претставува помош за исплата на плати и пензии и ќе обезбеди работа на болниците, училиштата и станбени услуги, вели Фон дер Лајен
Европската комисија ја уплати првата рата од три милијарди евра од пакетот макрофинансиска помош од 18 милијарди евра за Украина, изјави претседателката на ЕК, Урсула фон дер Лајен.
Таа истакна дека тоа е прва транша од предвидените 18 милијарди евра помош за Украина за 2023 година.
„Тоа ќе ја зајакне финансиската стабилност на Украина, помош за исплата на плати и пензии и да обезбеди работа на болниците, училиштата и станбени услуги“,
истакна Фон дер Лајен во говорот на Светскиот економски форум во Давос.
Таа додаде дека ЕУ ги воведе најсилните санкции досега, поради што руската економија се соочува со деценија на регресија, а нејзината индустрија нема никаква модерна и критична технологија“.
„Нема да има неказнивост за руските злосторства. И нема да има прекин во нашата непоколеблива поддршка за Украина, од помагање за обновување на струјата и водата, до подготовката за долгорочни напори за реконструкција“,
рече Фон дер Лајен.
Вчера Фон дер Лајен на Твитер напиша дека клучно и итно е да и се помогне на Украина да ги исполни своите финансиски потреби за да се соочи со руската агресија.
„Комисијата дејствува со максимална брзина и решителност, веќе утре ќе ги исплатиме првите три милијарди евра од 18 милијарди макрофинансиска поддршка договорена во декември“,
напиша Фон дер Лајен.
Предвидено е идните исплати на Украина ќе изнесуваат 1,5 милијарда евра месечно, почнувајќи од март, и ќе бидат условени со задоволителен напредок кон спроведувањето на договорените реформски услови.
За да ги финансира овие заеми, ЕК се задолжува од пазарите на капитал во рамките на својот единствен пристап за финансирање.
ЕУ потпиша договор од 18 милијарди евра финансиска помош за Украина, кои ќе се исплаќаат во форма на високоповластени заеми, кои ќе се исплаќаат на редовни рати во 2023 година, а исплатата на каматата ќе ја покрива Европската Унија.