Како што информираа од Алијанса за Албанците, во фокус на двете средби на Таравари со косовскиот државен врв била моменталната состојба на северот на Косово, која, како што се додава, АА ја следи со загриженост и ги осудува тамошните дестабилизирачки структури
Пред вечерашната најавена средба на лидерите на албанските партии од земјава со премиерот на Албанија, Еди Рама, в Тирана, претседателот на Алијанса за Албанците (АА) Арбен Таравари ги посети претседателката на Косово, Вјоса Османи и косовскиот премиер Албин Курти.
Како што информираа од партијата, во фокус на двете средби на Таравари со косовскиот државен врв била моменталната состојба на северот на Косово, која, како што се додава, Алијансата за Албанците ја следи со загриженост и ги осудува тамошните дестабилизирачки структури.
На одвоените средби со Курти и Османи, Таравари им честитал за поднесената апликација на Косово за членство во Европската Унија.
„Со надеж дека ЕУ ќе биде на ниво на исклучителен предизвик кој ги загрозува мирот, безбедноста и нашите заеднички вредности, а ние како субјект ќе ги поддржиме сите напори на Косово за зајакнување на нејзиниот меѓународен субјективитет“,
им порачал лидерот на Алијанса за Албанците на Курти и Османи.
На средбите со косовскиот државен врв и лидерот на АА, станало збор и за заедничките проекти меѓу Косово и Северна Македонија, иницирани од страна на Приштина, а потпишани меѓу двете страни.
„Проектите се сметаат за важни за граѓаните и економијата на нашите две земји, но за жал наидуваат на стагнација од страна на институциите и Владата во Скопје“,
се заклучило на средбите.
За време на посетата на Косово, претседателот на Алијанса за Албанците (АА) Арбен Таравари бил во придружба на пратениците Артина Ќазими и Елми Азири.
Денеска во Тирана ќе се одржи средба меѓу лидерите на политичките партии од албанскиот блок во Македонија со премиерот на Албанија Еди Рама. Освен првиот човек на Беса, Билал Касами, кој одби да оди на средбата, извесно е присуството на лидерите на останатите партии на Албанците во земјава.