Заробувањето на една држава и системската корупција им овозможува на автократите да ја задржат власта, да ги лишат општествата од критичките гласови и да ја поткопаат демократијата и владеењето на правото, порачува државниот секретар на САД
Санкции и визни ограничувања од САД добија вкупно 65 лица и ентитети од 17 земји, објави Стејт департментот.
Новата листа, САД ја објавуваат на денешниот Меѓународен ден за борба со корупцијата и во пресрет на Денот на човековите права. Лицата кои се најдоа на „црната листа“ се од Русија, Иран Кина, Северна Кореја, Хаити, Филипините, Шри Ланка итн …
„Руската инвазија на Украина е остар потсетник дека корумпираните режими се меѓу најлошите од оние кои ги кршат и злоупотребуваат човековите права. Активностите што ги преземаме денес ги одразуваат напорите на САД за справување со овие предизвици на глобално ниво“,
вели државниот секретар на САД, Ентони Блинкен.
Во изјавата објавена на веб-страницата на Стејт департментот тој нагласување дека заробувањето на една држава и системската корупција им овозможува на автократите да ја задржат власта, да ги лишат општествата од критичките гласови и да ја поткопаат демократијата и владеењето на правото.
Понатаму во изјавата тој ги констатира и „аномалиите“ во одредени региони, како што е корупцијата која е основна причина за миграција во Централна Америка, злоупотреби на државни ресурси и проневери во Африка …
„Нашите санкции се насочени кон руски функционери и нивни полномошници кои ја овековечија нелегалната и смртоносна војна на Русија во Украина преку одвратни операции и насилни депортации на граѓаните на Украина, вклучително и на деца. Ја повторуваме нашата осуда за бруталните чинови на насилство на Иран врз мирните демонстранти, тековното негирање на човековите права и основни слободи и сеприсутната репресија и државно спонзорираното насилство врз жените“,
истакнува понатаму Блинкен.
Тој во изјавата со објаснување на санкциите ги споменува и сексуалната злоупотреба и експлоатација на деца и жени на Филипините, прекршување на човековите права во Перу и Индонезија итн.
Меѓу оние кои се ставени под санкциите на САД на новата листа се, на пример, Централната изборна комисија на Русија и неколку службеници од администрацијата на претседателот Владимир Путин, како и украински судија за барање мито во замена за несоодветно судско влијание.
На крајот тој порачува дека САД се посветени на тоа санкциите да бидат применети со максимален ефект со цел спречување на корупцијата и злоупотребата на човековите права во сите форми, како и поддршка за најранливите категории.