Демантот од Демократска Бугарија следува откако вчера бугарскиот медиум „Стандард“ објави дека освен рускиот и белорускиот амбасадор во Бугарија, пратениците го покренале прашањето дали македонската амбасадорка во Бугарија треба да биде поканета на конститутивната седница на новото 48. Народно собрание откако химната на Бугарија беше исвиркана на фудбалски натпревар во Скопје
Парламентарните партии во новото 48. Народно собрание на Бугарија не покренале прашање дали македонската амбасадорка во земјата треба да биде поканета на конститутивната седница на новиот бугарски парламент која е закажана за 19 октомври.
Ова за дописникот на МИА од Софија го изјавиле од прес-центарот на Демократска Бугарија откако вчера дел од бугарските медиуми објавија дека освен рускиот и белорускиот амбасадор во земјата, на конститутивната седница на собранието, нема да биде поканета ниту амбасадорката на Северна Македонија, Агнеса Руси Поповска.
Вчера бугарски „Стандард“ објави дека пратениците го покренале прашањето дали македонската амбасадорка во Бугарија треба да биде поканета на конститутивната седница на новото 48. Народно собрание откако химната на Бугарија беше исвиркана на фудбалски натпревар во Скопје.
Претставничката на Русија, Елеонора Митрофанова и привремениот управител на Амбасадата на Белорусија во земјата, Никита Лешуков, нема да добијат покани за отворањето на 48. Народно собрание на 19 октомври, соопшти вчера Надежда Јорданова од Демократска Бугарија по средбата на парламентарните партии во парламентот.
На новинарско прашање како ќе биде образложена оваа одлука во однос на државниот протокол, таа одговори дека има пишани правила во оваа насока и дека нема задолжителна листа со покани. Јорданова посочи дека на земјата домаќин е да одлучи кој да биде поканет согласно ставот на политичките партии, а администрацијата на парламентот ќе го извести Министерството за надворешни работи, од каде што ќе ги испрати соодветните писма со одлуката.