Две лица со повреди на рацете се примени вечерва во Универзитетската клиника за хируршки болести „Свети Наум Охридски“ (стара Градска болница) во Скопје. МИА, повикувајќи се на извор од Болницата, јавува дека приемот на двете лица бил околу 20 часот и дека повредите биле нанесени од остар предмет на дланките.
Едно од лицата е испратено за понатамошен третман на скопските клиники, а второто лице е пуштено на домашно лекување.
Информацијата од клиниката „Св. Наум Охридски“ коинцидира со известувањето во повеќе медиуми за инцидент што се случил во автобус на ЈСП Скопје во Кисела Вода. Според наводите, за кои засега нема потврда од МВР, во автобус со број 51 избила тепачка, наведоно меѓу средношколци од Моране и Студеничани. Се јавува и дека по настанот е нападната новинарска екипа која дошла да известува.