Четирите нови пациенти од дебарско, кај кои беше дијагностициран коронавирус, во секој момент треба да пристигнат во Скопје и да се сместат на Инфективната клиника, информираше министерот за здравство, Венко Филипче.
Меѓу нив има и едно 15-годишно момче.
Заедно со четворицата нови пациенти, бројката на заразени во земјава се искачи на вкупно 13. Од нив, се влошила состојбата на првата заразена пациентка од Дебар и таа од утрово е поставена на апарати за дишење.
В понеделник, според Филипче, од Инфективната клиника на домашно лекување ќе биде пуштена жената од Скопје која беше првиот случај на заразен во земјава.
Денеска, како што претходно објави на социјалните мрежи министерот, се тестираат седум пациенти. Шестмина се од Дебар. Од нив четворица биле во контакт со заразените, а останатите двајца се епидемиологот и лаборатот кои засега немаат симптоми, но се проверуваат за секој случај. Седмиот случај, кој се тестира преку Центарот за јавно здравје во Битола, е странец.
Дополнително, попладнево брисеви за тестирање се испратени од уште двајца наши државјани кои се јавиле со покачена температура. Тие изминатиот период биле на патување во Шпанија.