Во насока на подобра урбанизација на просторот кај поранешна „Треска“, Герасимовски посочи дека ги повикал градоначалничката на Град Скопје, Данела Арсовска, Министерството за транспорт и врски, но и другите институции, да излезат во пресрет што побрзо и да се донесе што е можно подобар ДУП
Во однос на причините за пожарот кој во април годинава избувна во просториите на поранешната фабрика „Треска“, Герасимовски посочи дека се работи за човечки фактор и дека Општината имала информации месеци наназад за тој дел за кражби на кабли, старо железо и дека не верува дека е подметнат намерно
Градоначалникот на Општина Центар, Горан Герасимовски, во денешното гостување во емисијата „Клик плус“ на ТВ 21 кажа оти неговото залагање е што подобро урбанизирање на просторот кај поранешната фабрика „Треска“, но како што вели и самиот, не треба да се занемари тоа што на на местото веќе има важечки ДУП.
Доколку не се постапува по тој ДУП, вели Герасимовски, тоа е кршење закон.
„Мојата борба е што подобро да го урбанизираме тој простор. Се бориме за интересот на јавното добро и интересот на граѓаните“,
додаде Герасимовски.
Градоначалникот уште еднаш повтори оти на просторот кај поранешна „Треска“ има околу 40 градежни парцели кои предвидуваат изградба на станбени згради, но посочи и дека за просторот има и претходни идејни решенија за негово урбанизирано уредување.
„Нашата цел е преку регулационен план да го одвоиме тој дел од ДУП Буњаковец 1 и 2, каде што се наоѓа и парцелата за ‘Треска’. Ги повикав и ги повикувам институциите од кои што зависиме, за подобро и побрзо носење на самиот план, вклучувајќи го и Град Скопје, каде денеска имаме и состанок за што побрзо да се донесе подобар план“,
изјави Герасимовски.
Во таа насока, Герасимовски ги повика градоначалничката на Град Скопје, Данела Арсовска, Министерството за транспорт и врски, но и другите институции, да излезат во пресрет што побрзо и да се донесе што е можно подобар ДУП.
„Целта ми е, а верувам дека и другите ќе се согласат, дека треба сите заедно да се заложиме за што подобро да го урбанизираме просторот. За да имаме успех, треба сите заедно да дадеме се од себе и да направиме напор што побрзо ја направиме таа регулација“,
вели Герасимовски.
Градоначалникот додава дека насоките на планерите и урбанистите што ги добиваат се, како што вели, да се оди во висина за да се ослободи што повеќе јавен простор за повеќе сообраќајници, подобри решенија за подземно паркирање во целиот комплекс, ослободување простор за пешачки и велосипедски патеки.
„Сепак, станува збор за поголема парцела и голем број згради коишто се предвидени на тој дел“,
заклучи Герасимовски.
Во однос на причините за пожарот кој во април годинава избувна во просториите на поранешната фабрика „Треска“, Герасимовски посочи дека се работи за човечки фактор и дека општината имала информации месеци наназад за тој дел за кражби на кабли, старо железо и дека не верува дека е подметнат намерно.
„Неколку месеци, во соработка и комуникација со одредени институции, чекавме да заврши целиот увид на терен, чекавме зелено светло од сите институции за да им дадеме насока на сопствениците да си го расчистуваат просторот“,
изјави градоначалникот Герасимовски, додавајќи дека неколку пати излегле на терен со Државниот инспекторат за животна средина и им дале насоки на сопствениците како да го чистат просторот.
Откако минатата недела официјално започна расчистувањето на просторот на поранешната фабрика „Треска“, од граѓанската иницијатива Шанса за Центар реагираа дека шансите потенцијалот на „Треска“ да биде искористен се сè помали, а дека наместо квалитетно планирање на просторот се добива помирување и нормализирање на урбицидот.
Посочуваат дека додека се развлекуваат постапките за изработка на нов план, наместо да се разработи најдоброто оценето решение од конкурсот, инвеститорите испраќаат барања за откуп на делови од државното земјиште во „Треска“ за дооформување на парцелите според урбанистички план кој, како што велат, е нелегален.