Градоначалничката на ВМРО-ДПМНЕ во Скопје по подолго време денеска се појави пред јавноста. Но, Аровска не кажа ниту збор за проектите што им ги вети на скопјани, а не ги реализира, се вели во реакцијата на СДСМ, во однос на денешната прес-конференција на градоначалничката на Град Скопје, Данела Арсовска.
За време на прес-конференцијата Арсовска презентира дел од мерките на Град Скопје за заштеда на електричната енергија, а од владејачката партија прашуваат што е со ветените проекти, како и тоа дали Мицкоски е тој што ги кочи започнатите проекти.
„Каде е бесплатниот превоз? Каде се 250 нови автобуси? Зошто проектите важни за скопјани и започнати пред неколку години се уште стојат недовршени, како мостот во Аеродром, клучката кај Момин Поток, но и многу други? Дали Христијан Мицкоски стои зад ова и намерно ги кочи сите започнати проекти за свои бизнис-интереси?“,
велат од СДСМ и потенцираат дека по 10 месеци од функцијата Данела не реализирала ништо од ветеното пред граѓаните.
Инаку, за време на денешната прес-конференција, градоначалничката Арсовска истакна дека рестрикции во уличното осветлување нема да има, иако ќе се намали неговиот интензитет и ќе се премине во етапна промена на ставање на ЛЕД-осветлување.