Како што соопштија од МВР, во два случаи комбињата се обиделе да го заобиколат законот со тоа што празни ја поминувале границата, додека патниците пеш минувале и потоа се качувале во нив
За два дена, полицијата само кај граничничниот премин Табановце откри три комбиња кои превезувале патници надвор од земјава без лиценци и друга соодветна документација. По документирање на случаите ќе бидат поднесени соодветни поднесоци, соопшти денеска Министерството за внатрешни работи.
Во контролите спроведени вчера и денеска, констатирано е дека првото комбе со струмички регистарски таблички управувано и сопственост на лице од Струмица, откако влегло во земјава преку „Табановце“ празно и без патници, во близина на граничниот премин застанало и им дозволило на шест лица патници да се качат во комбето, откако претходно се договориле тие пеш да ја минат државната граница и потоа да се качат во комбето за да се превезат до Струмица.
Второто возило, исто така со струмички регистарски таблички, сопственост на лице од Струмица и управувано од лице од Струмица е сопрено околу 300 метри пред „Табановце“, и констатирано е дека возилото не поседува лиценца за вршење на јавен меѓународен превоз, а превезувало осум патници за Германија.
На влез во земјава е сопрено уште едно комбе со струмички регистарски таблички во кое имало пет патници кои патувале од Германија. При проверката било утврдено дека возачот не поседува соодветна документација за извршување на јавен меѓународен превоз, а исто така земени се писмени изјави од патниците кои изјавиле дека патуваат од Германија и на возачот му платиле 120 евра по лице за превоз, а државната граница со Србија ја поминувале пеш.
По документирање на случаите ќе бидат поднесени соодветни поднесоци, се наведува во соопштението од МВР.