Оттаму додаваат дека со наредбата за претрес и барањето за податоци од страна на Управата се бараат сите анонимни кривични пријави доставени до Управата за финансиска полиција од 2018 година до денот на претресот, односно денот на одговор по барањето, a оти во тој момент Управата располагала со обезбедени 35 предмети оформени по анонимни кривични пријави и тие биле веднаш доставени во Обвинителството за гонење на организиран криминал и корупција (ОЈО ГОКК)
Во однос на претресот во Финасиската полиција, претходно денеска, шефицата на Основното јавно обвинителството за гонење на организиран криминал и корупција Вилма Русковска кажа дека не дошле до докази зашто не им биле доставени сите документите кои ги барале
Управата за финансиска полиција реагира оти е невистинита изјавата која претходно денеска ја даде обвинителката Вилма Русковска, односно дека обвинителката барала од Управата за финансиска полиција конкретни 300 предмети, а дека ѝ биле доставени само 30-ина предмети кои таа не ги ни барала.
Оттаму додаваат дека со наредбата за претрес и барањето за податоци од страна на Управата се бараат сите анонимни кривични пријави доставени до Управата за финансиска полиција од 2018 година до денот на претресот, односно денот на одговор по барањето, a оти во тој момент Управата располагала со обезбедени 35 предмети оформени по анонимни кривични пријави и тие биле веднаш доставени во Обвинителството за гонење на организиран криминал и корупција (ОЈО ГОКК).
„Во барањето за податоци даден ни е рок за постапување од 10 дена и истиот започна да тече од 18 јули 2022 година. Седум дена по претерсот и барањето, односно на 25 јули, кога Управата за финансиска полиција излезе со соопштение во јавноста во кое информиравме за претресот и поднесени претставки поради сомнение за злоупотреби од страна на обвинителката Вилма Русковска, во 14 часот во Управата пристигна допис со кој што се бараше Управата веднаш да ги достави дотогаш прибраните предмети и списи. Управата за финансиска полиција во тој момент располагаше со обезбедени 35 предмети оформени по ‘анонимни кривични пријави доставени до Управата од 2018 година до денот на одговор на барањето’ и тие предмети беа веднаш доставени во Обвинителството за гонење на организиран криминал и корупција“,
наведуваат од Управата.
Во меѓувреме, како што посочуваат оттаму, постапувајќи по наведеното барање, од страна на Управата за финансиска полиција дополнително се обезбедени уште 150 предмети оформени по „анонимни кривични пријави доставени до Управата од 2018 година до денот на одговор на барањето, а за истото со допис е известено ОЈО ГОКК.
„Во дописот, меѓудругото е наведено следното ‘Согласно член 287 ст.2 од Законот за кривична постапка „Субјектите од ставот (1) на овој член се должни на јавниот обвинител да му достават податоци, известувања, документи, предмети, банкарски сметки или списи кои му се потребни во текот на постапката. Јавниот обвинител има право да бара податоци, известувања, документи, предмети, банкарски сметки или списи и од други правни лица и од граѓаните за кои може основано да смета дека располагаат со такви податоци или информации.“, а имајќи го предвид Извештајот од извршениот Надзор од Јавното обвинителство на Република Северна Македонија во кој што извештај е констатирана ненадлежност на обвинителките Вилма Русковска, Ивана Трајчева и Елизабета Јосифовска да постапуваат по конкретниот предмет РО бр.155/22, Ве молиме писмено да не известите на чие надлежно постапување, согласно одредбите од Законот за јавно обвинителство е доделен предметот РО бр.155/22, а со цел од страна на Управата за финансиска полиција на надлежниот јавен обвинител да му бидат предадени бараните податоци/предмети и воедно со надлежниот обвинител да биде составен Записник за примопредавање на предмети.“,
се наведува во соопштението од Управата.
Управата за финасиска полиција, додаваат оттаму, е во исчекување на одговорот од ОЈО ГОКК, а со цел да ги достави обезбедените податоци/предмети кои се побарани од Управата согласно Барањето за податоци РО 155/22 од 18 јули 2022 година.
Во однос на претресот во Финасиската полиција, претходно денеска, шефицата на Основното јавно обвинителството за гонење на организиран криминал и корупција Вилма Русковска кажа дека не дошле до докази зашто не им биле доставени сите документите кои ги барале.
„Не дојдовме до докази зашто ние со претресот ги набројавме точно кои предмети треба да ни бидат доставени. Се работи за околу 250 – 300 предмети од кои ни беа доставени 30-ина, повеќето од кои воопшто не ги баравме. Сè уште нема доставено скоро ниту еден предмет од тие кои ги имаме побарано“,
изјави Русковска.
Претресот во Управата за финансиска полиција беше извршен на 18 јули. Тогаш од Обвинителството за гонење организиран криминал и корупција, со кое раководи Русковска, само кратко потврдија дека вршат претрес и оти станува збор за предмет оформен по пријава од граѓани.
Од Управата, пак, уште тогаш го квалификуваа претресот како непотребен и незаконски и обвинија дека станува збор за намерно инсценирани и неосновани напади кон нив кои доаѓаат од еден ист центар. Поднесоа и претставка до државниот обвинител за постапувањето на истражителите и обвинителите, како и до судијата на претходна постапка од Основниот кривичен суд Скопје кој ја издал наредбата за претрес врз основа на барањето на обвинителството.
По претставката, обвинители извршија надзор по што од кабинетот на државниот обвинител Љубомир Јовески излегоа со соопштение во кое наведоа пропусти во постапувањето.