Искусниот економист, во интервју за Дојче Веле, ги споделува неговите ставови за актуелните економски предизвици со кои е соочена земјава
Нѐ чека тешка зима – дефицитите на јавниот сектор се огромни, структурните слабости се несовладливи дури и на среден рок, а зависноста од надворешните шокови е непремостлива, оценува Петар Гошев, поранешен министер за финансии и поранешен гувернер на НБРМ. Искусниот економист, во интервју за Дојче Веле, ги споделува неговите ставови за актуелните економски предизвици со кои е соочена земјава. Дел од нив се резултат на екстерни шокови, но останатите ги смета за резултат на повеќедецениско отсуство на соодветни домашни политики.
Гошев вели дека не се исполнети очекувањата дека со ставањето под контрола на пандемијата, економијата повторно ќе ја фати нагорната линија и дека инфлацијата ќе се смири. Напротив, според него, на светската економија или на онаа во најразвиениот дел од светот, повторно ѝ се заканува состојбата од седумдесеттите години на минатиот век, означена со терминот „стагфлација“ – застој или пад на економската активност, проследен истовремено со поголем или помал раст на цените.
Енергијата и храната се безбедносни прашања од највисок ред
Според Гошев, во Македонија повеќе од четири децении не е изграден енергетски капацитет (занемарливи се Козјак и Света Петка) што значи дека толку децении е зголемувана нашата енергетска ранливост и зависност од увоз.
„И не само што не е одржувано и зголемувано производството на електрична енергија, туку само од 2010 година наваму е намалено за речиси една третина. Исто толку децении, поради отсуство на соодветни политики, ја имаме зголемувано и зависноста на земјата од увоз на храна, независно од тоа што во последните десетина години се исплатени над една милијарда евра на име земјоделски субвенции. Воопшто не помогна ни тоа што безброј пати сме говореле дека енергијата и храната се безбедносни прашања од највисок ред, како ни постојаните укажувања од некои поединци – меѓу нив и мојата маленкост, дека фискалната политика секогаш мора да има простор за одговор кога економијата непланирано ќе ја погодат некои интерни или екстерни шокови. Ништо од сето тоа, како и историјата на бројни примери за масовно гладување во светот, не допре до ‘тврдите уши’ на одговорните гарнитури во нашата држава“,
додава Гошев.
Во Македонија има конкуренција на олигархии
Гошев смета дека во Македонија нема партиски плурализам, туку има конкуренција на олигархии.
„Постоењето на конкурентски партии подразбира постоење на различни политички програми. На олигархиите не им се својствени политичките програми. Нив ги интересира само присвојувањето на националното богатство и јавните пари, ги интересира спиралата пари-моќ-пари и јавното добро час поскоро да стане приватно“,
потенцира Гошев.
Целото интервју со поранешниот министер за финансии и поранешен гувернер на НБРМ, Петар Гошев може да се прочита на следниот линк.