Сега, како што посочи Маричиќ, сè е во наши раце и тоа е добро затоа што не зависиме од која било друга држава. Според него, ако секој пратеник и секоја политичка партија се постави мудро, умно и одговорно, тогаш процесот на уставни измени ќе може да се направи до крајот на скринингот. Тој посочи дека за Владата најважно е во преговорите со Европската Унија постојано да одиме напред, да не се назадуваме, затоа што новата методологија, како што додаде, на некој начин „го казнува назадувањето и може да ве врати на почетокот“
За Владата најважно е во преговорите со Европската Унија постојано да одиме напред, тие да бидат неповратни, значи да не се враќаме назад, да немаме назадување по извесен број години, бидејќи новата методологија на некој начин го казнува назадувањето и може да ве врати на почетокот, вели вицепремиерот за европски прашања Бојан Маричиќ во интервју за ТВ Телма.
Сега, како што посочи Маричиќ, сè е во наши раце и тоа е добро затоа што не зависиме од која било друга држава. Според него, ако секој пратеник и секоја политичка партија се постави мудро, умно и одговорно, тогаш процесот на уставни измени ќе може да се направи до крајот на скринингот.
Зборувајќи за уставните измени кои се клучни за продолжување на преговорите со Унијата, Маричиќ истакна дека времетраењето на скринингот, кој според него очекува да трае 16 месеци, дава доволно простор да се отвори дијалог со политичките партии, и со пратениците за да се види кога би било тоа најлогично и најсоодветно да се направи.
„Мислам дека треба да се отвори една суштинска дискусија која што ќе нè одведе и во содржината на уставните измени, која што мислам дека не е спорна, бидејќи треба да дополниме во Преамбулата и во уште еден амандман, неколку заедници коишто не се спомнати во Уставот, за поддржување на нашите европски интеграции“,
посочи Маричиќ.
Според вицепремиерот, имаме позитивно ниво за да го почнеме и да го завршиме скринингот успешно, бидејќи сме на исто рамниште или во некои делови и подобри од оние земји кои веќе десет години се во преговарачкиот процес.
„По нашите анализи степенот на усогласеност е некаде околу 45 проценти, што не е малку и е навистина на добро ниво. Постојат области каде што сме на исто рамниште дури и подобри од државите кои преговараат, на пример Кластерот ‘Темелни вредности’, таму сме први во регионот, подобри и од државите кои веќе десет години преговараат. Секако има области, како што е внатрешен пазар, каде што имаме многу работа и каде што допрва треба да се усогласуваме“,
рече Маричиќ.
Вицепремиерот, меѓу другото, објасни дека во Секретаријат за европски прашања секоја година се прави детална анализа на секој Извештај и оти прават т.н. „гап анализа“, увид кои мерки се позитивно оценети, кои се оценети дека треба повеќе, која според последниот Извештај вели дека има околу 57 проценти од мерките коишто се оценети како позитивни, односно има реална усогласеност и 43 проценти, кои допрва треба да се усогласуваат.
Во следниот период, како што најави Маричиќ, ќе се фокусираат, паралелно преку Националната програма за приближување на законодавството, да се интензивира имплементирањето на законодавството на ЕУ и дека тоа е динамична работа, која зависи од капацитетот на институциите, но и од политичкиот притисок и политичката волја.
„Секако дека имаме уште многу за работа, и во делот на владеењето на правото и во делот на другите стандарди, но ова е еден процес којшто треба да заврши на тој начин што ние ќе функционираме комплетно како држава членка на ЕУ“,
истакна Маричиќ.