Граничниот премин „Пелинце“ од утре во 7:00 часот утрото ќе биде затворен за возила и патници, соопшти Министерството за внатрешни работи.
Одлуката доаѓа откако соседна Србија вечерва одлучи да преземе поригорозни мерки за заштита од коронавирусот. Сите патници и возила кои планирале да патуваат од Србија кон нашата земја и обратно преку граничните премиини „Пелинце“ (од македонска страна) и „Прохор Пчински“ (од српска страна) да се пренасочат кон граничниот премин Табановце – Прешево.
Србија вечерва на владина седница донесе низа мерки за заштита од коронавирус, а меѓу другите реши да затвори 44 мали и повремени гранични премини. Сите патниците, возила и товарни возила ќе бидат пренасочувани кон главните гранични премини.
„Кога станува збор за услужните објекти кои се наоѓаат на транзитната рука низ Србија и на автопатиштата, донесена е одлука, сите лица кои работат во такви објекти да бидат обезбедени со заштитни средства поради доаѓање во контакт со транзитни патници“,
соопшти српската Влада.
Ги повикуваат граѓаните, кои работат во странство и кои планирале да се вратат во земјата за време на Велигденските празници, да ги одложат нивните планови за патување.
Исто така, се апелира до сите граѓаните кои планираат да организираат приватни настани како свадби, крштевки и слични манифестации со поголем број на луѓе да се придржуваат до воведените мерки – да нема повеќе од 100 присутни лица.