Согласно вчера донесените мерки на српската влада за забрана за влез на странски државјани кои доаѓаат од жариштата на вирусот ковид-19, од преминот „Батровци“ на границата на Србија со Хрватска денеска се вратени дваесетина автомобили со околу 50 патници, меѓу кои повеќето македонски државјани кои работат во северниот дел на Италија.
Како што јави МИА од Белград, новите мерки не се применуваат само во патничкиот туку и во товарниот сообраќај, поради што од граничните премини се вратени и неколку камиони.
Српските гранични служби ја имаат потребната заштитна опрема – ракавици, маски и средства за дезинфекција, а по потреба користат и заштитни костими.
Српските државјани кои доаѓаат од Италија подлежат на сите мерки на заштита, како и другите патници. По контрола на санитарната инспекција, досега немало потреба да се преземат дополнителни мерки за надзор.
Владата на Србија вчера донесе одлука за привремена забрана за влез во Србија за странски државјани кои доаѓаат од области со интензивно пренесување на коронавирусот. Ова се однесува на лица што престојувале во Италија, одредени провинции во Кина, Јужна Кореја, Иран и делови од Швајцарија.
Од вчера во Србија привремено се укинати летовите од земјите што се жаришта на вирусот, меѓу кои се Италија и Швајцарија.
Кога станува збор за аеродромите, странските државјани штодоаѓаат од државите каде што коронавирусот е жариште, не можат да ја поминат граничната контрола, каков што беше случајот вчера, кога од нишкиот аеродром беа вратени сите странски државјани кои пристигнаа во Србија од италијанскиот град Бергамо, додека српските граѓани беа упатени во домашна самоизолација.