Припадниците на полицијата патролно ги контролираат лицата на кои им е одредена мерка изолација поради коронавирусот. На граничните премини тие делат информативни флаери, а врз основа на увид во патните исправи, доколку проценат или доколку сам се пријави одреден граѓанин, наш државјанин, кој доаѓа од високоризичните земји, се интервјуира или по потреба се повикува екипа од Министерството за здравство, соопшти денеска министерот за внатрешни работи Наќе Чулев.
Во моментов МВР е ангажирано на петте сувоземни гранични премини на кои се упатуваат сите граѓани кои доаѓаат од високоризичните земји, како и на двата аеродроми.
„Засега имаме волонтери од Црвениот крст кои се активни само на два гранични премини – Табановце и Деве Баир, додека на сите останати премини припадниците на Граничната полиција вршат интервјуа со потенцијалните носители на коронавирусот. Во однос на лицата на кои веќе Институтот за јавно здравје им одреди мерка изолација, со оглед дека тој број постојано се зголемува, капацитетите на МВР се користат за нивно патролно обезбедување“,
рече Чулев одговарајќи на новинарско прашање по посетата на полициската станица во Гази Баба.
Поради зголемената изложеност на ризик и можен контакт со заболени, МВР набавило и во постапка на набавка на дополнителна заштитна опрема.
„Тоа се заштитни ракавици, односно гумени ракавици и заштитни маски. Но имаме набавено и заштитни маски со повисок степен на заштита со филтри кои припадниците на МВР ја употребуваат на граничните контроли кога вршат во автобуси и во други средства за превоз со поголем број на патници. Истовремено ќе набавиме средства за дезинфекција и ќе бидат поделени по полициски станици“,
рече министерот Чулев.
Се опремуваат и управните служби, а и увидните екипи со оглед дека тие се најмногу во допир со повеќе граѓани.