По новите регистрирани случаи на заболени од коронавирусот, Владата денеска ќе ги разгледува опциите за евентуално воведување нови поригорозни мерки за превенција.
Министерот за здравство Венко Филипче денеска ќе одржи состанок со Комисијата за заразни болести и Комисијата за следење и информирање за состојбите со коронавирусот, а нивните предлози ќе ги испратат до Владата која ќе ги разгледува не денешната седница. Состанокот ќе се одржи во проширен состав, а како што соопштија од Министерството за здравство, на него ќе присуствуваат и искусни експерти од различни области.
Засега, препораките се да не се одржуваат јавни собири, спортските натпревари да се играат без публика и да не се патува без потреба во земјите каде што има коронавирус, но сите се на ниво на апел бидејќи, како што претходно објасни Филипче, досега немаше локална трансмисија на вирусот.
Поригорозни мерки за заштита синоќа побара Општина Дебар, откако беа регистрирани три нови заболени од коронавирусот. Советот на Општината побара да се прекине училишната настава на неопределено време, а Владата да ја разгледа можноста за скратување на работното време за државната и јавната администрација.
*Поврзани вести
Уште три лица од Дебар позитивни на коронавирусот
Општина Дебар: Да се затворат училиштата и да се работи со скратено време