ВМРО-ДПМНЕ обвинуваат дека власта ќе прифати предлог кој во себе содржи механизми кои на Бугарија ѝ овозможуваат целосен диктат на процесот во кој, според опозицијата, или ќе ги прифаќаме нивните барања или ќе добиваме континуирано вето.
„Тие тврдат дека во рамката за почеток на преговори не се опфатени т.н. историски прашања, но во суштина истата таа рамка содржи Годишен извештај или Протокол кој треба да го цени официјална Софија и од чија содржина зависи напредокот на Македонија. Е токму тука во овој годишен извештај ќе се проценува реализацијата на членот 12 од договорот со Бугарија од 2017 година и во кој извештај таксативно и прецизно бугарската страна бара конкретни промени на учебници за лица и настани, споменици и т.н. Така на пример, со точен рок се обврзува македонската страна да направи промена на лекции во учебникот за 7 одделение по географија, во учебникот по историја за Цар Самоил, а во некоја наредна фаза и промена на учебниците кои се однесуваат на Илинденското востание, Гоце Делчев, Сандански, Груев и сите видни револуционери и историски настани“,
кажа на денешната прес-конференција Драган Ковачки, пратеник и член на ИК на ВМРО-ДПМНЕ.
Ковачки посочи дека суштинското отворање на пристапниот процес е условен од промена на Уставот и заради ултиматумите смета дека власта не треба да го прифати предлогот.
ВМРО-ДПМНЕ повторни ги повика граѓаните на протест пред Влада и вечерва во 19 часот, додека претходно, во 15 часот партискиот лидер Христијан Мицкоски ќе оствари средба со премиерот Димитар Ковачевски токму на оваа тема.
Средбата Ковачевски – Мицкоски е дел од најавените широки консултации откако Владата го доби модифицираниот француски предлог.