Одговарајќи на прашањето дали се плаши дека тоа што ѝ се случува на С Македонија со Бугарија во европските интеграции може да ја снајде и Србија со Косово, таа додаде дека тоа веќе се случува и посочи дека иако во официјалната преговарачка позиција на ЕУ никаде не споменува дека официјален Белград треба да ја признае независноста на Косово, сега се слушаат такви работи
Српската премиерка Ана Брнабиќ смета дека тоа што Северна Македонија се условува на патот кон ЕУ со билатерални прашања од спорот со Бугарија е преседан што го отежнува патот на сите од Западен Балкан.
„Ако видовме една работа тоа е дека кога ќе се постави еден преседан, тој се повторува. Она што е направено е навистина преседан. Да се решаваат какви било билатерални прашања и со тоа да го условувате европскиот пат на една земја која ги исполнила сите услови за да почне со преговори, е преседан и ако мене ме прашувате тоа не треба и не смее да се повторува. Дали може да се повтори? Апсолутно верувам дека може и дека ќе го отежни патот на сите нас од Западен Балкан во ЕУ“,
изјави Брнабиќ одговарајќи на новинарски прашања во Охрид каде што учествува на „Преспа форумот за дијалог“.
На прашањето дали се плаши дека тоа може да ѝ се случи и на Србија со Косово, таа рече дека тоа веќе се случува и посочи дека иако во официјалната преговарачка позиција ЕУ никаде не споменува дека официјален Белград треба да ја признае независноста на Косово, сега се слушаат такви работи.
„Дали тоа веќе ѝ се случува на Србија? Да, се случува со тоа што во нашата преговарачка позиција јасно се зборува за нормализација на односите помеѓу Белград и Приштина односно Србија и Косово, но Косово во согласност со Резолуцијата 1244 на Советот за безбедност на ОН која го гарантира територијалниот интегритет на Србија во рамки на меѓународно признаените граници. И никаде не се споменува, ниту со збор ниту со буква, признавање на таканаречената Република Косово од страна на Република Србија, за што сега слушаме дека постојат некои зборови. Тоа не е во согласност со официјалната преговарачка позиција на ЕУ. Ако треба да ја менуваат, нека ја менуваат, но додека ова е официјална позиција тоа е официјална позиција и тоа е така. Но, би бил преседан среде преговорите да ја менувате преговарачката позицијата“,
рече Брнабиќ.
Премиерката посочи дека Србија се наоѓа во уште потешка ситуација откако почна војната во Украина бидејќи се соочува со огромно лицемерство на голем број земји членки на ЕУ и некои други кои од една страна го признаваат Косово, а од друга страна се борат за територијалниот интегритет на Украина.
„Додека се борат со сето срце и душа за територијалниот интегритет на Украина во согласност со меѓународното право и основниот принцип на меѓународното право – територијалниот интегритет, истовремено тој прв принцип на меѓународно право не важеше за Република Србија туку го прекршија 1999 година и 2008 година. Како сега територијалниот интегритет во случајот на Украина мора се брани по секоја цена, а во случајот на Србија не е важно, може да се прекрши“,
рече Брнабиќ.