Покрај овој нокаут за македонската дипломатија, слушам уште еден преседан, а тоа е да се уценува Македонија земја кандидат, а притоа да се излезе со позиција дека Украина заслужува кандидатски статус, рече Мицкоски
Лидерот на ВМРО-ДПМНЕ, Христијан Мицкоски, во вечерашното гостување во „Само интервју“ на Канал 5 ТВ коментирајќи ги информациите кои излегуваат во јавноста за францускиот предлог за кревање на ветото, рече дека доколку е точно тоа бугарските барања да влезат во преговарачката рамка тоа би било нокаут за нашата дипломатија.
„Врз основа на тоа што го читаме и добивме како информација, ако е така тогаш е шокантно, негативно и лошо. За тоа зборував цело време, дека се предвидува да сите барања на Бугарија бидат дел од преговарачката рамка. Ова е нокаут за македонската дипломатија“,
рече Мицкоски во „Само интервју“.
Тој го повтори ставот дека тоа би значело оти ние или ќе се асимилираме, односно бугаризираме или никогаш нема да бидеме дел од ЕУ. Ако е ова предлогот, нагласи тој, тогаш не би сакал таква иднина односно не би сакал влезе во ЕУ.
„Тоа е класичен нокаут. За мене уште поголем нокаут е лицемерната политика. Затоа што денеска покрај овој нокаут за македонската дипломатија, слушам уште еден преседан, а тоа е да се уценува Македонија земја кандидат, а притоа да се излезе со позиција дека Украина заслужува кандидатски статус. Македонија во 1999 г. беше добар домаќин на стотици илјади НАТО војници, имавме војна на нашата северна граница, никој тогаш не ни рече од утре сте членка на НАТО, туку во 2008 г. повторно бевме уценувани да менуваме име. Македонија имаше внатрешен конфликт, никој тогаш не кажа од утре сте кандидат за ЕУ, чекавме до 2005 г. Работевме за да дојдеме до тој кандидатски статус“,
рече лидерот на ВМРО-ДПМНЕ.
Жалам за тоа што се случува во Украина, рече тој, но жалам и за тоа што се случува во Македонија.
„Десетици автобуси полни си одат со млади од државава затоа што некој 22 години не влече за нос. Нема што да се разговара за ваква позиција“,
изјави Мицкоски.