Европските лидери се упатија во Ирпин, каде што Русија, според тврдењата на украинските власти, извршила злосторства од големи размери, објавија тамошните медиуми
Францускиот претседател Емануел Макрон за време на денешната посета на Киев изјави дека во украинската престолнина дошол заедно со германскиот канцелар Олаф Шолц и италијанскиот премиер Марио Драги, со цел да ја изразат својата поддршка за Украина потенцирајќи дека наредните неколку недели ќе бидат исклучително тешки.
„Ова е многу важен момент. Оваа порака за единство и поддршка која ја испраќаме до Украина. Сакаме да разговараме за сегашноста и иднината бидејќи наредните недели, како што знаеме, ќе бидат многу тешки“,
изјави Маркон во Киев, пренесува Ројтерс.
Макрон, Шолц и Драги денеска заедно со воз пристигнаа во Киев за да ја изразат својата поддршка за Украина, а при официјалниот почеток на нивната посета во украинската престолнина се огласија сирени за опасност од воздушни напади, пишува Ројтерс.
Посетата на тројцата лидери на Киев се подготвуваше со недели, а Украина порано изрази незадоволство од нивниот однос кон конфликтот во оваа земја оценувајќи дека Франција, Германија, а во помала мера и Италија, премногу бавно испорачуваат оружје во Украина.
„Овде сме заедно, фокусирани и обединети, и заедно со претседателот Зеленски ќе ги посетиме местата каде што се извршени масакри“,
изјави Макрон.
Лидерите се упатија во Ирпин, каде што Русија, според тврдењата на украинските власти, извршила злосторства од големи размери, објавија тамошните медиуми.
Се очекува и извршната власт на ЕУ утре да предложи Украина да стане формален кандидат за членство, пренесе Ројтерс повикувајќи се на изјави на неименувани дипломати и функционери.
Од друга страна, пак, Алексиј Арестовиќ, советник на Зеленски, порано оваа недела за германски „Билд“ изјави дека е загрижен дека тројцата лидери ќе извршат притисок на Киев да го прифати мировниот договор поволен за рускиот претседател Владимир Путин.
Реагирајќи на оваа изјава на Арестовиќ, Драги во вторникот изјави дека е важно мировните договори да започнат што побргу, но додаде дека тие мораат да бидат под услови кои Украина ги смета за прифатливи.