Со слична реакција се јавија и од Алијанса за Албанците велејќи дека итно е потребно намалување на акцизата и ДДВ-то на горивата
Откако цените отидоа плафон, Бектеши носи мерки, а решението е само владата да ги намали даноците и акцизите, реагираат од ВМРО-ДПМНЕ откако министерот за економија најави дека од утре – 15 јуни до 30 септември ќе има ново ограничување на маржите на основните прехранбени продукти.
„Крешник Бектеши денес се фали со замрзнување на маржата на производите за исхрана, а не кажува дека со тоа ќе затвори голем број пекари, малопродажни објекти и ќе влијае лошо на целата економија. Власта не се откажува од акцизата за да има повеќе да краде. Наместо замрзнување на цените, потребно е намалување на даноците и акцизата за горивата“,
велат од ВМРО-ДПМНЕ.
Само со 50 отсто намалување на акцизата на горивата и ДДВ од 18 на 5 отсто, велат од опозицијата, цените на горивата ќе бидат за 25 денари пониски, а со тоа ќе заштедат граѓаните, производството ќе биде поевтино, исто како и транспортот.
„Импликациите врз Буџетот ќе бидат околу 50 милиони евра помалку за една година, но импликациите врз економијата,ќе бидат неколкукратно поголеми, бидејќи и самото производство ќе биде поконкурентно. Од друга страна со 0 отсто ДДВ за продуктите за исхрана и други продукти кои се важни во криза ќе се спаси стандардот на граѓаните и ќе се спречи бран на сиромаштија“,
додаваат од ВМРО-ДПМНЕ.
Со слична реакција се јавија и од Алијанса за Албанците велејќи дека итно е потребно намалување на акцизата и ДДВ-то на горивата.
„Ја повикуваме Владата и министерот Бектеши дека сега е време да ги прифатат предлозите на Алијансата за Албанците, за намалување на акцизата и ДДВ-то на горивото, објавени од почетокот на кризата. Потсетуваме, Алијансата за Албанците предлага намалување на ДДВ од 18 на 5 отсто, намалување на акцизата на бензините од 22 денари на 15 денари и на дизелот од 15,5 на 9 денари, како и намалување на трговска маржа во фиксна вредност не повеќе од 3 денари“,
велат од Алијанса за Албанците.