Според нив, месната индустрија во изминатите четири години докажала дека не го нарушила и воопшто не го намалила развојот на домашното фармерско производство додека се применувала мерката
Групацијата на месопреработувачи и месни индустрии преку Стопанската комора на Северна Македонија бара продолжување на мерката за ослободување од царина за замрзнато свинско месо наменето за преработка. Претставници на Групацијата денеска јавно побараа средба со вицепремиерот за економски прашања Фатмир Битиќи, за да ги образложат барања за продолжување на оваа мерка.
„Во спротивно, на краток рок, 2 до 3 недели, во зависност од тековните резерви, прво следува нов ценовен шок од 20 до 30 отсто зголемувања на цените на месните преработки од свинско месо, второ намалување на бројот на вработени за исто така 20 до 30 отсто, а на подолг рок, зголемување на увозот и престанок со работа на некои од месопреработувачките капацитети“,
изјавија од Стопанската комора.
Оттаму истакнаа дека тие не бараат помош, ниту субвенции, туку само изедначување на условите за стопанисување. Според нив, месната индустрија во изминатите четири години докажала дека не го нарушила и воопшто не го намалила развојот на домашното фармерско производство додека се применувала мерката.
„Домашното производство расте, што е видливо од податоци од АХВ и платежната Агенција за субвенции во земјоделство, го намали увозот на готови производи и започна со извоз, го зголеми обемот на работење, бројот на вработени и висината на личните доходи во гранката“,
велат од СКСМ и посочија дека овие мерки не направиле позначајни фискални импликации кон државата.
Од Комората истакнаа и дека годишно преку редовна уплата на придонесите од вработување се придонесува директно со повеќе од 4,5 милиони евра во Буџетот.
„Оваа индустрија со важечките царински давачки е ставена во нерамноправна положба со странските производители, пред сè оние од соседството, но и од ЕУ. Готовите производи од надвор влегуваат во земјата со 0 % царина, а ние, домашните преработувачи, при увоз на суровина плаќаме царина во висина од 20 до 35 %. Ова уште повеќе ќе биде нагласено со функционирањето на ‘Отворен Балкан’“,
велат од Стопанската комора.