Во штрајк стапуваат вработените во јавниот сектор на 22 јуни, а ќе штрајкуваат на своите работни места. Не се исклучува можноста штрајкот да се одвива и преку изразување на разни форми на работничкото незадоволство и синдикален притисок
Сојузот на синдикатите на Македонија (ССМ) повикува и поведува на штрајк на 22 јуни со цел заштита на економските и социјалните права на своите членови и на вработените во јавен сектор од работниот однос. Како што соопштија од ССМ, рокот за исполнувања на нивните барања е до 21 јуни оваа година.
Од ССМ објаснуваат дека штрајкот се организира за заштита на економските и социјалните права и остварување на следните барања од работен однос – склучување општ колективен договор за јавен сектор со утврдено зголемување на платите на вработените во јавниот сектор за 2 806 денари во нето-износ, согласно зголемувањето на минималната плата објавена во службен весник од 24 февруари 2022 година и утврдено право на регрес за годишен одмор во висина од 30 до 100 проценти од основицата.
Одлуката за повикување и поведување штрајк заедно со писмена најава за штрајк е доставена до Владата, Собранието и градоначалниците во насока на писмено најавување на штрајкот согласно Законот за работните односи.
Според одлуката, во штрајк стапуваат вработените во јавниот сектор на 22 јуни, а ќе штрајкуваат на своите работни места. Не се исклучува можноста штрајкот да се одвива и преку изразување на разни форми на работничкото незадоволство и синдикален притисок.
„Потсетуваме дека Сојузот на синдикатите на Македонија уште на 29 јуни година до Владата и претседател на Владата достави предлог општ колективен договор за јавниот сектор, а од страна на Владата, КПВРСМ бевме информирани дека во насока на реализација на нашите заложби, дописот со предлогот е доставен на натамошно надлежно постапување до МТСП. Иако се одржаа неколку состаноци по однос на предлогот на ССМ за нов Општ колективен договор за јавниот до склучување не дојде“,
посочуваат од ССМ.
ССМ смета дека доколку се изгласа ребалансот на буџетот без да се предвидат средства за зголемување на платите во јавниот сектор, нема да може да се постапи согласно закон и ќе нема средства за усогласување на платите на вработени во јавниот сектор ниту од 1 јули, како што е барањето на ССМ, ниту во Законскиот рок за усогласување на платите.