„Доколку има вето и овој пат тоа ќе биде надополнување на ветото на претходната бугарска влада и во тој случај заложник на проширувањето на ЕУ, покрај нашата држава ќе биде и соседната Албанија. Тоа треба да им е јасно на сите земји членки на ЕУ и затоа Брисел треба што поскоро го отвори процесот на преговори за Северна Македонија и за Албанија со одржување на првата меѓувладина конференција со ЕУ за двете земји“, рече премиерот Ковачевски во пресрет на јунскиот самит на ЕУ
Без разлика на исходот на јунскиот самит на Европската Унија, определбата на Северна Македонија останува јасна и цврста за членство во ЕУ, рече премиерот Димитар Ковачевски во интервју за „Ал Џезира“, додавајќи оти сега Европската Унија треба да го одржи своето ветување и на следниот самит да ја исправи грешката што досега беше направена.
„Без разлика на исходот од јунскиот самит нашата определба останува јасна и цврста за членство во ЕУ. Ако ги погледнеме и емпириските податоци за нашата држава тогаш многу јасно се гледа каде треба да бидеме интегрирани бидејќи 80 отсто од нашата надворешно-трговска размена е со земји членки на ЕУ, 80 проценти од странските инвестиции во нашата држава се од земји членки на ЕУ“,
додаде Ковачевски во интервјуто.
За отпочнување на преговорите, како што дополни Ковачевски, остануваат политичките чекори, а единственото можно решение кое може да биде одржливо и кое ќе биде основа за понатамошно унапредување на добрососедските односи, како што кажа, е решение базирано на европски вредности, кое истовремено се грижи за достоинството на сите граѓани на Северна Македонија, но и на граѓаните на Бугарија.
Во однос на очекувањата од јунскиот самит на ЕУ, Ковачевски потенцира дека за него било познато дека нема да биде лесно на патот кон ЕУ, и нагласи дека тој постојано инсистирал на тоа дека не се врзува за датуми затоа на тој начин непотребно се подгреваат очекувањата кои кога нема да бидат исполнети следуваат разочарувањата.
„Ние имаме многу јасна цел да ги отпочнеме преговорите со ЕУ. Доколку има вето и овој пат тоа ќе биде надополнување на ветото на претходната бугарска Влада и во тој случај заложник на проширувањето на ЕУ, покрај нашата држава ќе биде и соседната Албанија. Тоа треба да им е јасно на сите земји членки на ЕУ и затоа Брисел треба што поскоро го отвори процесот на преговори за Северна Македонија и за Албанија со одржување на првата меѓувладина конференција со ЕУ за двете земји“, посочи премиерот Ковачевски во интервју за Ал Џезеира.
Премиерот дополни дека Северна Македонија ги спроведе сите активности и ги исполни сите услови за отпочнување на меѓувладината конференција што беше потврдено со четири последователни позитивни извештаи од Европската Комисија.
„Нашето законодавство е хармонизирано со законодавството со ЕУ во обем поголем од 45 проценти. Ако ги погледнеме бенчмарк анализите со земји кои 10-тина години преговараат со ЕУ, тогаш многу јасно се гледа дека Северна Македонија е понапредна во одредени поглавја од земји кои преговараат, а ние се уште ги немаме отворено преговорите. Ние имаме целосна усогласена надворешна политика со ЕУ и од таа перспектива одлуката останува единствено на земјите членки на ЕУ и на Владата на Бугарија“,
нагласи премиерот Ковачевски.
За предлогот за формирање на некој вид европска политичка заедница, премиерот Ковачевски истакна дека за таа иницијатива нема конкретен предлог и дека таа иницијатива повеќе се однесува на Украина, Молдавија и Грузија и дека за неа се размислува како за модел кој би бил адекватен за овие земји, а не за земјите од Западен Балкан за кои постои веќе оформен процес на пристапување со многу јасна цел и патека по која треба да се одвиваат преговорите за членство и кои веќе имаат одреден напредок во тој процес.