Доколку законот за контрола на оружјето биде усвоен, би се зголемила старосната граница за купување полуавтоматски пушки и би се забранила продажбата на муниција со повеќе од 15 куршуми, сепак, како што пишуваат светските медиуми, предлогот речиси и да нема никакви шанси да биде одобрен од Сенатот бидејќи треба да биде поддржан од уште 10 републикански пратеници
Претставничкиот дом на американскиот Конгрес денеска го усвои предлог-законот за контрола на оружјето како одговор на неодамнешните напади во Њујорк и Тексас. Сепак, како што пишуваат светските медиуми, предлогот скоро и да нема никакви шанси да биде одобрен од Сенатот, со што официјално би станал и закон.
Доколку законот за контрола на оружјето биде усвоен, би се зголемила старосната граница за купување полуавтоматски пушки и би се забранила продажбата на муниција со повеќе од 15 куршуми.
Предлог-законот е усвоен во Претставничкиот дом главно преку партиско гласање со 223 гласа „за“, главно од демократите, и 204 гласа „против“.
Сепак, според медиумите, овој предлог-закон речиси нема никакви шанси да биде усвоен бидејќи Сенатот во моментов одржува дебати фокусирани на подобрувањето на програмите за ментално здравје, зајакнувањето на безбедноста во училиштата и подобрувањето на проверката на минатото на лицата што сакаат да купат оружје. Дополнително, потребно е да се обезбедат 10 гласа од републиканците во Сенатот.
„Не може да спасиме сечиј живот, но зарем не треба да се обидеме? Американци, ве слушаме денес и во Претставничкиот дом ги преземаме мерките што ги барате“,
рече една од претставничките на демократите во Претставничкиот дом, Вероника Ескобар.
На гласањето му претходеше дебата, како и сведочења на жртвите од масовните напади што се случија во САД во изминатите неколку недели. Една од жртвите што сведочеа е единаесетгодишната М.С., која го преживеала масакрот во училиштето во Јувалде така што се намачкала со крвта на нејзината соученичка и се преправала дека е мртва.
Крвавиот пир на осумнаесетгодишниот Салвадор Рамос во градот Јувалде во Тексас започнал со расправија меѓу напаѓачот и неговата баба, по што тој пукал во неа, а потоа влегол во автомобилот, отишол во основното училиште, влегол во една од училниците и почнал да пука, при што убил 19 ученици и двајца професори.
Во нападот, штитејќи ги децата од куршумите, загинале наставничките Ева Мирелес и Ирма Гарсија.
Официјалните лица соопштија дека напаѓачот Салвадор Рамос е мртов. Вооружениот напаѓач бил убиен од агент на граничната патрола кој влетал во училиштето со тим за тактичка поддршка и го убил додека бил забарикадиран внатре во училиштето.