Реакцијата на МНР доаѓа откако вчера „Нова Македонија“ објави дека неименувани извори за медиумот од Организацијата на обединетите нации (ООН) изјавиле дека во инструкциите до службите на Секретаријатот се вели дека мора да се „избегнува“ терминот „македонски јазик“ во согласност со општиот став дека терминот „Македонија“ и сите негови изведенки не смеат да се користат
Министерството за надворешни работи денеска истакна дека единствениот референтен документ на Организацијата на обединетите нации за главните обележја и податоци за земјите е UNTERM, а дека во него се дадени основните информации за една земја кои ОН мора да ги почитува.
Ова доаѓа откако вчера „Нова Македонија“ објави дека неименувани извори за медиумот од Организацијата на обединетите нации (ООН) изјавиле дека во инструкциите до службите на Секретаријатот се вели дека мора да се „избегнува“ терминот „македонски јазик“ во согласност со општиот став дека терминот „Македонија“ и сите негови изведенки не смеат да се користат.
Истите извори, како што додаваат од медиумот, наведуваат дека без оглед што на официјалната страница на ОН сè уште пишува „македонски јазик“, во тек е постепено елиминирање на сите деривати произлезени од терминот „Македонија“, вклучувајќи и на јазикот, без оглед што тој во ОН како таков е признаен многу одамна.
Од МНР во меѓувреме посочуваат оти Секретаријатот на ООН и сите негови тела се должни да ги почитуваат сите основни информации за една земја како официјалното име, кратко име, јазикот, називот на валутата, ISO кодовите и слично кои се запишани на документот UNTERМ.
„Секретаријатот на ООН, како и сите негови тела е обврзан да се придржува и да ги почитува податоците изнесени во истиот (UNTERM). Вработените во Секретаријатот на ОН немаат надлежност за толкување на вакви прашања. Секретаријатот на ОН раководи и има надлежност во менаџирањето на прашањата околу употребата на 6-те официјални јазици на Организацијата (англиски, француски, шпански, арапски, кинески и руски)“,
стои во реакцијата на МНР.
Оттаму додаваат дека постојаната мисија на С Македонија при ОН во Њујорк одржува редовни средби со претставници на Секретаријатот на ОН, и во таа насока нема никакви индиции што одат во прилог на, како што велат, објавените шпекулации.
„Согласно појавениот интерес на јавноста, нашата мисија во Њујорк стапи во контакт со претставници на Секретаријатот, од каде дополнително и официјално ни беше потврдена важечката пракса и регулатива преку која категорично ги отфрлаат сите шпекулации изнесени во медиумите за наводна „внатрешна инструкција во ООН за начинот на користење на терминот – македонски јазик“,
се додава во реакцијата на Министерството.
Оттаму велат дека пријавените информации се злонамерни шпекулации, чии намери, како што велат, се да создаваат непотребно вознемирување на јавноста, и не одат во прилог на интересите на Северна Македонија.