Министерот за надворешни работи Бујар Османи се сретна со Мустафа Шентоп, претседател на Големото национално собрание на Република Турција
Во рамките на официјална посета на Анкара, министерот за надворешни работи на Република Северна Македонија, Бујар Османи, се сретна со Мустафа Шентоп, претседател на Големото национално собрание на Република Турција.
Како што соопшти МНР, Османи и Шентоп ги потврдија традиционално добрите и пријателски односи помеѓу двете држави и заеднички ја истакнаа важноста на улогата на парламентарните групи за соработка, како и придонесот на над сто склучени билатерални спогодби во продлабочување на повеќесекторската соработка, чиј особен резултат е растечката економска и трговска размена.
„Пријателството меѓу граѓаните на двете држави и нашата дијаспора во Турција е нашиот мост кој не спојува. Турската етничка заедница има посебен придонес во политичкиот, културниот и економскиот развој на Северна Македонија, како дел од нашиот уникатен модел на мултиетничка функционална демократија”,
истакна министерот Османи.
Османи исто така оствари средба и со поранешниот министер за надворешни работи на Турција, Хикмет Четин, кому му врачи специјално признание по повод 30-годишнината на независноста на Северна Македонија.
Четин беше министер за надворешни работи во еден исклучително важен период од нашата понова политичка историја – на нашето осамостојување и Турција е меѓу првите земји кои ја признаа нашата независност.
Во рамките на престојот во Анкара, министерот Османи положи венец во Мавзолејот на Мустафа Кемал Ататурк оддавајќи почит на големиот државник и основач на модерна Република Турција.