Министерот Спасовски изјави дека се поднесени соодветни кривични пријави за полициските службеници кои земаа мито, а внатрешната контрола работи и во однос на уништувањето на средствата за работа
На случајот со земањето мито од страна на полициски службени на Граничниот премин „Блаце“ работи внатрешната контрола и кога истиот ќе биде затворен, ќе се донесат одлуки во делот на водењето на дисциплинската постапка, кажа денеска министерот за внатрешни работи, Оливер Спасовски, за случајот за кој пред околу два месеци телевизија Клан објави видео како се зема мито од албански државјани кои ја преминуваа границата.
Исто така, според неговата изјава, се работи и на утврдување на околностите околу уништување на камерите.
„За полициски службеници кои направија кривично дело во однос на поткупот се поднесени соодветни кривични пријави. За сите полициски службеници, работи внатрешната контрола во однос на уништувањето на средствата за работа. За тоа постојат правилници, постојат упатства како и на кој начин ќе се користи опремата и секако дека покрај дисциплинската ќе има и материјална одговорност во овој дел. Ние известуваме и надлежно обвинителство кое што работи, а тоа е Одделението во ЈО за организиран криминал. Доколку се утврди дека има елементи на сторено кривично дело ќе одговараат и кривично тие полициски службеници коишто го сториле тоа кривично дело. Меѓутоа, мора да се знае точно да се утврди и оние коишто направиле и материјална штета на МВР да си ја покријат таа материјална штета“,
истакна Спасовски.
Во видеото кое кон средината на април годинава го објави ТВ Клан во емисијата „Стоп“ се гледаше како раководител на смена на „Блаце“ зема мито од државјани на Албанија кои ја минуваат границата. За случајот тогаш МВР соопшти дека двајца полицајци ќе добијат кривични пријави и ја најави дисциплинската постапката која се уште трае.