Последен пат руски и украински претставници се сретнаа на разговори во Истанбул на 29 март годинава
Москва е благодарна на Турција за нејзиниот предлог да биде домаќин на руско-украински преговори со посредство на Обединетите нации, но разговорите за иницијативата сега се бесмислени, изјави денеска портпаролката на руското Министерство за надворешни работи, Марија Захарова.
„Волјата за посредување во мировни преговори е секогаш добредојдена, но мислам дека во моментов е бесмислено, дури и теоретски, да се разговара за одговорот на оваа иницијатива“,
рече Захарова, коментирајќи го предлогот на турскиот претседател Реџеп Таип Ердоган да ги покани Москва и Киев да разговори во Истанбул.
Како што е познато, во телефонски разговор во понеделникот со рускиот претседател Владимир Путин, Ердоган рече дека може да организира средба меѓу Русија, Украина и ОН во Истанбул и оти е подготвен да „игра улога во потенцијалниот механизам за следење доколку се постигне некаков начелен договор меѓу двете страни“.
Русија и Украина досега одржаа неколку рунди на преговори, но повеќе од два месеци нема никаков напред. Последен пат руски и украински претставници се сретнаа на разговори во Истанбул на 29 март годинава.