Претседателот на државата денеска беше во посета на Уставниот суд, на покана на претседателката на Судот, Добрила Кацарска
Во интерес на сите е Уставниот суд да работи во комплетен состав, со целосен капацитет и во соодветни технички услови, истакна претседателот Стево Пендаровски денеска при посетата на Уставниот суд, на покана на претседателката на Судот, Добрила Кацарска.
За време на средбата, на која присуствуваа и претседателот на Собранието Талат Џафери и премиерот Димитар Ковачевски, Пендаровски, како што соопшти неговиот кабинет, бил запознаен со тековните активности на Уставниот суд и предизвиците во неговата работа.
„Претседателката на Судот посочи на проблемите со кадровската неекипираност, а исто така ги претстави техничките услови за работа на судот и потребата за нивно подобрување“,
се наведува во соопштението.
На средбата биле пренесени и неколку иницијативи во однос на исполнувањето на надлежностите на судот, вклучувајќи ја можноста за воведување на уставна тужба со проширување на надлежностите на Уставниот суд.
Од Кабинетот на претседателот посочуваат дека тој ја истакнал потребата за скорешно надминување на предизвиците во работата на Уставниот суд, посочувајќи дека во интерес на сите е Уставниот суд да работи во комплетен состав, со целосен капацитет и во соодветни технички услови.
Претседателката на Уставниот суд Добрила Кацарска денеска по средбата, на прес-конференција предупреди дека ситуацијата со бројот на судии во Уставен е сериозна и затоа на состанок ги повикала претседателот на државата, на Собранието и на Владата.