Заклучено дека е потребно да се направи и сеопфатна анализа на законската регулатива во спортот, како и да се зајакне инспекцискиот надзор врз спортските организации, но и да се направи анализа на досегашните инспекциски наоди за да се детектираат слабостите и ќе се креираат политики за добро владеење
Ревизија на моделот за примената на спортските ваучери, подготовка на етички кодекс за спортскиот сектор и политики за зајакнување на интегритетот, задолжителна транспарентност при носењето на одлуките во спортските клубови и федерации и отчетност при користење на јавните средства, се само дел од заклучоците на денешната конференција „Отворено за корупцијата во спортот и штетата што корупцијата ја нанесува на младите спортски таленти“, на која домаќин беше заменик-претседателката на Владата задолжена за политики за добро владеење Славица Грковска.
На конференцијата, како што информира прес-службата на Владата, беше заклучено дека е потребно да се направи и сеопфатна анализа на законската регулатива во спортот, како и да се зајакне инспекцискиот надзор врз спортските организации, но и да се направи анализа на досегашните инспекциски наоди за да се детектираат слабостите и ќе се креираат политики за добро владеење. Да се разгледа можноста да се воведе спортски менаџер како професија, но и да се инсистира на доследно спроведување на Националната стратегија за спречување на корупцијата и судирот на интереси.
Заменик-претседателката на Владата задолжена за политики за добро владеење Славица Грковска ја нагласи потреба во јавноста да се отвори прашањето за корупцијата во спортот, зашто досегашната пракса покажува дека спортските субјекти, пред се спортските национални федерации, во најголем дел не работат транспарентно и отчетно, а тоа негативно се одразува на легитимитетот и кредибилитетот на спортскиот дух.
Ова е прашање што е актуелно во целиот свет, ОН го има поставено високо на агендата и ние како држава, нагласи Грковска, имаме обврска да работиме на подобрување на состојбите во спортот од аспект на корупцијата и нејзиното штетно влијание.
Дел од учесниците на конференцијата ја нагласија потребата од заштита на спортистите во делот на пријавување на корупција, по моделот на Законот за укажувачи.
На конференцијата воведни обраќања имаа амбасадорите на Романија и на Шведска во земјава, Адела Моника Аксинте и Кристин Форсгрен Бенгстон, како и Бил Вуд, шеф на Канцеларијата на Обединетите нации за борба против дрога и криминал (UNODC).
На пане- сесиите учествуваа директорот на Агенцијата за млади и спорт Наумче Мојсовски, Иван Анастасовски, професор на Факултетот за физичко образование, спорт и здравје, истакнати спортски работници, спортисти и спортски новинари, како и членови на Државната комисија за спречување на корупцијата.
Конференција беше организирана во соработка со Канцеларијата на ОН за борба против дрогата и криминалот (UNODC).