Тој рече и дека следната недела ќе поднесе официјално барање Конгресот да го одобри вториот дополнителен пакет со помош за Украина
Американскиот претседател Џозеф Бајден во своето денешно обраќање порача дека е под знак прашалник дали руските сили целосно го контролираат украинскиот град Мариупол.
„Не е познати дали силите на Путин го контролираат Мариупол, уште нема докази дека овој град е целосно предаден“,
изјави Бајден.
Тој истакна и дека борбата за Киев била многу важна за украинскиот народ.
„Борбата за Киев беше историска победа за Украинците. Тоа беше победа за слобода која ја извојува украинскиот народ со помош на САД и нивните партнери“,
додаде Бајден.
Американскиот лидер денеска најави и дополнителни 800 милиони долари воена помош за Украина. Новиот пакет ќе вклучува тешка артилерија, 14 000 парчиња муниција и тактички дронови, соопшти Бајден.
„Сега мораме да го забрзаме тој пакет со помош, за да и помогнеме на Украина да се подготви за руска офанзива, која ќе биде поограничена во географска смисла, но не во смисла на нивната бруталност“,
рече Бајден.
Тој рече и дека следната недела ќе поднесе официјално барање Конгресот да го одобри вториот дополнителен пакет со помош за Украина.
Американскиот претседател рекол и дека размената на разузнавачки информации е приоритет за време на војна.
„Споделуваме и ќе продолжиме да споделуваме значајни благовремени разузнавачки податоци за Украина за да им помогнеме во борбата против руската агресија“,
порача лидерот на САД.