Тренчевска кажа дека понудата за покачување на платите од 10 отсто и подготовка на нова методологија, која ќе значи постојан раст на платите во јавниот сектор, е она што во моментов Владата може да го понуди. Повеќе односно 18 отсто покачување, како што бара СОНК, како што рече, би довело до нови проблеми со инфлацијата. Таа побара синдикатот уште еднаш да ја преиспита одлуката за одбивање на понудата и порача дека во услови на светска економска криза треба да се биде солидарен, како и дека во преговори не може само едната страна да биде флексибилна
Не се работи ниту за притисок ниту за уцена, се работи за почитување на Законот за работни односи и колективниот договор, вели министерката за труд и социјална политика Јованка Тренчевска за тоа што на вработените во градинките кои штрајкуваат ќе им се платат само придонеси по минимална основа.
„Во колективниот договор убаво е дефинирано што во случај на штрајк и што е должен работодавецот. Истото е дефинирано и во Законот за работни односи кој вели дека во услови на штрајк работодавецот е должен да им исплати придонеси на сите оние работници кои штрајкуваат на најниската основица за исплата на придонесите. Следниот член од законот, 241, дава можност СОНК да им обезбеди исплата на нето-плата на сите оние работници кои штрајкуваат. Затоа сметам дека се работи за почитување на закон и на колективен договор, а не за какви било притисоци или уцени од страна на Министерството врз градинките односно вработените кои штрајкуваат“,
изјави утрово Тренчевска.
Доколку таа потпише да им се исплатат плати на штрајкувачите, како што вели, може да одговара и кривично.
„Јас морам да ги почитувам законот и колективниот договор. Сè што ќе биде направено надвор од Законот за работни односи ќе биде злоупотреба на служена положба, а со оглед дека е поврзано со фискални импликации ќе сносам и кривична одговорност. Не сакам да се впуштам во такво нешто“,
рече министерката.
Тренчевска кажа дека понудата од покачување на платите од 10 отсто и подготовка на нова методологија која ќе значи постојан раст на платите во јавниот сектор е она што во моментов Владата може да го понуди. Повеќе односно 18 отсто покачување како што бара СОНК, како што рече, би довело до нови проблеми со инфлацијата.
„Владата го понуди решението кое е најсоодветно и во однос на Буџетот со кој располага и во однос да не се предизвикаат какви било несакани инфлаторни проблеми во државата. Во рамки на дијалогот кој се водеше со претставниците на СОНК, Владата го даде решението од 10 отсто покачување на платите во образованието и на воспитувачкиот кадар во детските градинки, отворање на процесот на подготовка на нов општ колективен договор за јавниот сектор во кој ќе се вклучи нова методологија која ќе значи постојан раст на платите во јавниот сектор, а тоа е платите на годишно ниво да бидат усогласувани со порастот на трошоците за живот и на просечната плата“,
рече Тренчевска.
Таа потсети и дека од вчерашната седница произлегол заклучок таа како министерка за труд и социјална политика, министерот за образование и наука и министерот за финансии со ребалансот на Буџетот да обезбедат пари за покачување од 10 отсто, како и да се испрати допис до СОНК да ја преиспита одлуката за одбивање на понудата.
„Мислам дека е солидарно да го прифатат овој предлог со оглед на тоа што навистина се наоѓаме во светска економска криза во рамки на која треба да бидеме солидарни. Во рамки на еден дијалог треба и двете страни да бидат флексибилни, не може едната страна само да покаже флексибилност“,
рече Тренчевска.
По вчерашната владина седница, пак, од СОНК најавија дека во текот на денешниот ден ќе имаат состанок и ќе ги разгледаат заклучоците.