Додека членовите на СОНК не се произнесат поинаку, штрајкот продолжува, порачаа од Синдикатот
Откако Владата на денешната седница дискутираше за состојбите во училиштата и градинките поради штрајкот на СОНК, од Синдикатот се огласија дека утре ќе ги разгледаат заклучоците, а дотогаш штрајкот ќе продолжи.
„СОНК очекува да ги добие денешните заклучоци на Владата а во врска со генералниот штрајк на вработените во детските градинки, основните и средни училишта. Советот на СОНК во текот на утрешниот ден ќе одржи седница на којашто детално ќе го проанализираат ставот на Владата и ќе се произнесе по него. Дотогаш, односно додека членовите на СОНК не се произнесат поинаку, штрајкот продолжува“,
пишува во соопштението на СОНК, чиј претседател Јаким Неделков, го објави на социјалните мрежи.
Владата на денешната седница ги задолжи министерствата за образование и наука и за труд и социјална политика, исплата на платите да ја прават согласно законските одредби во услови на штрајк. Двете министерства, заедно со Министерството за финансии се задолжени и со ребаланс на Буџетот да обезбедат пари за покачување од 10 отсто на платите, процент кој СОНК претходно се огласи дека не го прифаќа.
Исто така, дадено е задолжение и согласно законските можности да се обезбеди продолжување на наставата во школите и згрижување на децата во градинките, а од СОНК ќе се бара писмен одговор врз основа на кој правен акт тие тоа го прекинаа.
„Владата ги повикува раководителите на образовните институции, наставниците и воспитувачите во претшколските установи да продолжат со наставата, учениците да се вратат во училиштата, а родителите да продолжат да ги носат децата во градинките“,
повикаа од Владата претходно.