Од СОНК најавија дека денеска во МОН ќе продолжат преговорите во однос на нивните барања за покачување на платите
Од вкупно 75 јавни установи за згрижување и воспитание деца од предучилишна возраст, во 25 предучилишни установи за деца денеска воопшто не се штрајкува. Додека, пак, во 50 предучилишни установи штрајкуваат само дел од вработените. Односно, во штрајк се околу 45 проценти од вкупниот број вработени од установите каде што се штрајкува, информираа денеска од Министерството за труд и социјална политика.
Оттаму истакнаа дека согласно податоците на Министерството, кои се ажурираат на дневна основа, се бележи пораст од 30 отсто на згрижени деца во градинките за разлика од вчерашниот ден.
Министерството за труд и социјална политика наведе дека до инспекциската служба досега не е пристигната никаква поплака од страна на штрајкувачките одбори за попречувањето во одвивање на штрајкот во предучилишните установи.
Владата и Министерството за труд и социјална политика остануваат на ставот дека социјалниот дијалог мора да продолжи сè до изнаоѓање на заедничко соодветно решение, ставајќи ги интересите на децата на прво место, со цел да не се наруши згрижувачко-воспитниот процес.
Од самостојниот синдикат за образование и наука(СОНК), пак, кои го организираат штрајкот во градинките и училиштата, соопштија дека денеска во МОН ќе продолжат преговорите во однос на нивното барање за покачување на платите од 18,4 отсто.