Од снимкатасе гледа како едно лице удира по друго за кое се тврди дека е Тот, кој потоа паѓа на земја. Од видеото се гледа дека по падот, други лица продолжуваат да го удираат додека тој лежи на земја
Кратко време на Јутјуб се појави снимка за која се тврди дека е од моментот на претепувањето на ракометарот Денис Тот пред дискотека во Градскиот парк во Скопје, по којшто инцидент хрватскиот интернационалец беше префрлен во болница, каде им подлегна на повредите.
Од снимката, која ја преземаа и пренесоа повеќе медиуми, а на која тешко може да се препознаат лицата, се гледа како едно лице удира по друго за кое се тврди дека е Тот, кој потоа паѓа на земја. Од видеото се гледа дека по падот, други лица продолжуваат да го удираат додека тој лежи на земја, додека некои други се обидуваат да го одбранат.
За убиството на 28-годишниот ракометар кој настапуваше за ракометниот клуб Бутел, осомничени се три лица од Скопје, две момчиња на возраст од 28 и 22 години, како и 19-годишна девојка. Првоосомничениот е во бегство, додека другите две лица беа приведени и сега се наоѓаат во притвор.
„Кривично правниот настан се случил на 7 овој месец, во раните утрински часови, пред ноќен клуб во Скопје кога осомничените по кратка вербална расправија, го нападнале сега починатиот хрватски државјанин и му задале повеќе удари со боксови и клоци. Од ударите сега починатиот паднал и со задниот дел од главата удрил во асфалт и изгубил свест. Тројцата осомничени продолжиле со дејствија на удирање по главата, а потоа, без да му укажат помош, заминале од местото на настанот“,
соопштија од Основното јавно обвинителство (ОЈО) Скопје во саботата.
Тот бил забележан од вработена во ноќниот клуб пред кој се случил нападот, која повикала Итна медицинска помош, по што бил пренесен на Ургентниот центар во Скопје.
Според информациите од лекарите, кои ги сподели скопското обвинителство, ракометарот имал престанок на работата на срцето, масивен оток на мозокот, пресечен јазик и висока телесна температура. Бил ставен на апарати за дишење, но и покрај борбата на лекарите и обидите за реанимација, починал.
Инаку, првичните информации од лекарските извештаи беа дека тој бил примен на Клиниката за анестезија, реанимација и интензивно лекување (КАРИЛ), без срцева акција и без траги на насилство, но обдукцијата утврди дека смртта е насилна и настапила како резултат на повреди на мозокот настанати од нанесени удари. Од болницата потоа повторно се огласија дека на телото немало видливи повреди, а шефот на ОЈО Скопје во изјава за хрватската телевизија РТЛ кажа дека воопшто немало намера нешто да се прикрие туку дека тоа било лоша медицинска процена.