Херојскиот отпор на украинскиот народ е за највисоко восхитување, додека ја бранат својата татковина, тие ги бранат и нашите заеднички вредности, порача шефот на дипломатијата откако со министрите за надворешни на Полска и Шведска ја посетија украинската граница каде се сретнаа со Кулеба
Треба да направиме повеќе за да го запреме ова лудило, порача шефот на дипломатијата, Бујар Османи, кој како дел од тројцата претседавачи со ОБСЕ, со неговите колеги од Полска и Шведска, Збигњев Рау и Ан Линде, денеска беа на полско-украинсакта граница за да се сретнат со министерот за надворешни работи на Украина, Дмитро Кулеба.
„Треба да направиме повеќе, не само за справување со последиците, туку и да го запреме ова лудило. Херојскиот отпор на украинскиот народ е за највисоко восхитување: додека ја бранат својата татковина, тие ги бранат и нашите заеднички вредности, нашите принципи, нашиот начин на живот, и наша должност е да им помогнеме на секој можен начин“,
истакна Османи на заедничката прес-конференцијата со Рау и Линде одржана по средбата со Кулеба.
На средбата со украинскиот шеф на дипломатијата тие дискутирале за потребите на украинската страна за одбрана на својата земја, и помошта што меѓународната заедница треба да ја обезбеди на Украина за справување со последиците од војната.
Како што соопшти МНР, министрите го посетиле и прифатниот центар за бегалци Млини во близина на граничниот премин Корчова, на полско-украинската граница.
„Сликите од кампови и бранови на бегалци се длабоко вознемирувачки, особено за нашиот регион каде сè уште се свежи сеќавањата од војните во 90-тите година“,
нагласи Османи.
Министрите уште еднаш ја осудија неоправданата и неиспровоцираната руска воена инвазија врз една независна држава, спротивно на меѓународното право и основните документи на ОБСЕ. Воедно, укажаа и на неопходноста од почитување на меѓународното хуманитарно право и фундаменталните човекови права од страна на Руската Федерација.
Посетата на министрите од тројката претседавачи со ОБСЕ, како што велат од МНР, е дополнително уверување дека Украина ќе биде во фокусот на делувањето на ОБСЕ, и во таа насока ќе се искористат сите механизми на Организацијата за постигнување на мир, безбедност и трајна стабилност во земјата но и во целиот ОБСЕ регион.