Јавниот превоз е во прекин, а компаниите и фабриките ќе мора да запрат со работа или да работат од дома
Кина го воведе најголемиот карантин на територијата на еден град откако започна пандемијата со ковид-19 пред повеќе од две години.
Шангај ќе биде затворен во две фази во текот на наредните девет дена, а надлежните истовремено ќе ги тестираат граѓаните.
Овој град, важен финансиски центар, речиси еден месец се бори со нов бран на ковид-19, иако бројот на случаи не е висок според некои меѓународни стандарди.
Властите досега беа против затворање на градот од 25 милиони жители за да избегнат дестабилизација на економијата.
Но, откако во откако на 27 март во Шангај е забележан најголем пораст на дневен број на позитивни случаи уште од првите денови на пандемијата, надлежните попуштија.
„Заклучувањето“ ќе се одвива во две фази – источната страна на градот ќе биде затворена од 28 март до 1 април, а западната од 1 до 5 април.
Јавниот превоз е во прекин, а компаниите и фабриките ќе мора да запрат со работа или да работат од дома, соопштија надлежните власти.
Претходно во Кина цели провинции беа во карантин, иако луѓето често можеа да патуваат внатре во тие области. Но, поради големата густина на населеност, Шангај е најголемиот поединечен град кој досега бил во карантин.