Новото министерство нема да значи зголемување на бирократијата, велат од ВМРО-ДПМНЕ и најавуваат укинување на нефункционалните министерства
ВМРО-ДПМНЕ се обврзува на основање ново министерство за енергетика и минерални суровини кое ќе се фокусира на проблематиката на енергетиката како клучна област за стратешки развој за државата, велат во соопштение од опозициската партија.
„Тоа не значи дека ВМРО-ДПМНЕ ќе ја зголеми бирократијата. Напротив, ќе ја намали бирократијата и ќе го намали бројот на министерства кои сега се покажаа како нефункционални и непотребни во државната структура“,
соопштуваат од партијата чиј лидер е Христијан Мицкоски.
Оттаму додаваат дека „граѓаните на Република Македонија заслужуваат проекти кои ќе значат воведување на европските стандарди во однос на енергетската независност и ефикасност и заштитата на животната средина“.
„ВМРО-ДПМНЕ се обврзува да врши издавање зелени државни обврзници за повеќе зелени проекти. Овој проект предвидува Министерството за финансии да издаде зелени обврзници кои ќе бидат долгорочни должнички хартии од вредност. Средствата обезбедени по основ на овие обврзници ќе имаат стриктно определена намена односно ќе се користат за проекти за решавање на проблемот со загадувањето и заштитата на животната средина“,
велат од ВМРО-ДПМНЕ.