Освен герила-акцијата, активистите од иницијативата „Борба за Влае“ и жителите на населбата денеска во 17 часот повторно ќе одржат средба со цел да ги искористат последните денови до истекувањето на рокот за поднесување јавни анкети за спорниот предлог-урбанистички план, кој истекува в петок
Кревет со натпис „Да не ја преспиеме промената на ДУП-от“ се појави вчера на плоштадот „Делфина“ во скопско Влае како реакција на активистите во однос на спорниот предлог-урбанистички план за населбата, кој според локалците е закана за нејзината иднина.
Освен герила-акцијата, активистите од иницијативата „Борба за Влае“ и жителите на населбата денеска во 17 часот повторно ќе одржат средба со цел да ги искористат последните денови до истекувањето на рокот за поднесување јавни анкети.
Јавните анкети кои граѓаните ги доставуваат до Месната заедница и Општината се за да се спречи евентуалното усвојување на предлог-урбанистичкиот план, а рокот за нивно поднесување истекува в петок, на 25 март.
Предлог-урбанистичкиот план според кој во Влае би требало да никнат неколку станбени комплекси, од кои некои на државно земјиште, како и црква, монтажен паркинг и затворена спортска сала се дел од потенцијалните опасности кои ги посочуваат локалците, и кои, како што истакнуваат, би го затрупале Влае во густа бетонизација, а би го истиснале сето преостанато зеленило во населбата.
На фејсбук-страница на иницијативата „Борба за Влае“ вчера се појави и фотомонтажа направена од активистите на која се гледа како потенцијално би изгледала околината на плоштадот „Делфина“ ако се донесе предлог-урбанистичкиот план, според кој во околината би се изградила црква и станбен комплекс.
„Никој не може да гарантира дека вака ќе изгледа. Ова е авторска идеја од жител кој сака да остане анонимен. Сепак, на плацот за црквата се дозволени 49% за меморијален центар или гробишта. Веројатно симболиката што ќе се случи со Влае ако се изгради сè што е зацртано во предлог ДУП-от е јасна и без слика со гробишта“,
велат во објавата од иницијативата.
Но, она што е спорно за жителите на Влае не е и за градоначалникот на општината, Стевчо Јакимовски.
Тој во изјава за ТВ 24 пред неколку дена истакна оти новиот предлог-урбанистички план не е многу поразличен од претходниот, дури како што рече и самиот, има само подобрување во смисла на намалување на некои маркици, намалување на висините на градбите па дури и зголемување на зелените површини во населбата.